29 Кулун тутар 29.03
  • -11°
  • $ 92,26
  • 99,71

«Добрая Якутия» волонтердара оҕолору ыллыырга, үҥкүүлүүргэ үөрэтэллэр

16:36, 30 ноября 2016
Текст:
Читайте нас на
Яндекс Новости
ЯДВ

«Саамай ирдэбиллээх көрөөччүлэр — оҕолор» диэн артыыстартан, ырыаһыттартан үгүстүк истэр этим. Бу сырыыга маннык бэргэн этиини «Добрая Якутия» уопсастыбаннай хамсааһын волонтердарыттан иһиттим.


Өрөспүүбүлүкэҕэ сүрдээх элбэх уопсастыбаннай тэрилтэ баара биллэр. Аҥардас регистрацияламмытынан хас да тыһыынчаҕа тиийэр эрээри, дьиҥ үлэлии сылдьааччыта олох аҕыйах. Олортон биирдэстэрэ – «Добрая Якутия» хамсааһын. Баҕар, сорох дьон, бу хамсааһыны ойуччу ылан тоҕо өрө туттулар дии саныаххыт. Ол эрээри, бу хамсааһын икки ый анараа өттүгэр саҥа тэриллэн баран, номнуо сүрдээх элбэх тэрээһиннэри ыытта. Барытын оҕо үөрэ-көтө сылдьарыгар анаан оҥордо.

Уопсастыбаннай хамсааһын волонтердара Дьокуускай куорат коррекционнай оскуолаларын, оҕо дьиэлэрин уонна ыарахан балаһыанньаҕа киирбит ыаллары кытары үлэлииллэр, көмөлөһөллөр.

Ааспыт ыйга волонтерскай хамсааһын көҕүлээһининэн, Дьокуускайга «Папа, мама, мы – спортивная семья» күрэхтэһии ыытыллыбыта. Манна 2-с №-дээх өрөспүүбүлүкэтээҕи коррекционнай оскуола-интэринээт хамаандалара кыттыбыттара. Онтон куораттааҕы «Мы едины» күрэххэ 34-с №-дээх оскуола-интэринээт оҕолоро бастакы миэстэни ылбыттара. Бу оҕолору уопсастыбаннай хамсааһын волонтердара – Арктикатааҕы култуура институтун устудьуоннара үҥкүүгэ үөрэппиттэрэ.

Арктикатааҕы култуура институтун устудьуоннара оскуола-интэринээт иитиллээччилэрин үҥкүүлүүргэ, ыллыырга үөрэтэллэрин туһунан «Россия ыччатын сойууһа» уопсастыбаннай хамсааһын Саха сиринээҕи бэрэстэбиитэлистибэтин бэрэссэдээтэлэ Александра Семенова кэпсиир:

Бу күннэргэ Москваттан «Даниловцы» Россиятааҕы уопсастыбаннай тэриллии салайааччыта Юрий Белановскай үлэ үөрүйэҕин атастаһа, федеральнай уопсастыбаннай волонтерскай хамсааһыннар хайдах хабааннаахтык үлэлии сылдьалларын туһунан билиһиннэрэ кэлэ сылдьан: «Бу саҥа тэриллибит хамсааһыҥҥа 120-тэн тахса волонтер баҕа өттүнэн үлэлии сылдьара хайҕаллаах. Ыарыһах, инбэлиит, тулаайах хаалбыт оҕолорго материальнай көмө наадатын таһынан, оҕону аралдьытыахха, кэпсэтиэххэ наада. Маннык оҕолор наһаа соҕотохсуйаллар», – диэн иһитиннэрдэ.

Онон волонтер устудьуоннар оҕолорго сүрэхтэрин сылааһын, болҕомтолорун, сыраларын аныы сылдьалларыттан үөрүөх тустаахпыт. Волонтердар инники былааннара киэҥ. Улуус оскуолаларын, атын уопсастыбаннай тэрилтэлэри кытары ыкса үлэлэһэр соруктаахтар.

Следите за самым важным и интересным в Telegram-канале и WhatsApp-группе ЯСИА