Былатыан Ойуунускай аатынан Саха тыйаатырыгар бэҕэһээ, тохсунньу 15 күнүгэр, Саха АССР уонна РСФСР үтүөлээх артыыһа Федот Федотович Потапов, Саха норуодунай суруйааччыта, Саха АССР искусствотын үтүөлээх деятелэ Иван Михайлович Гоголев-Кындыл төрөөбүттэрэ 90 сылыгар аналлаах декада аһылынна. Саалаҕа тобус-толору көрөөччү муһунна.
Саха тыйаатырын кылаабынай режиссера Руслан Тараховскай бүгүҥҥүттэн саҕалаан көрөөччүлэр сыанаҕа 55 дьылын оонньонор «Наара Суох» испэктээги, онтон Ч.Айтматов «Ийэ сирэ», Н.Якутскай «Төлкө», И.Гоголев «Дыгын Дархан», «Хара кыталык» испэктээктэри көрүөхтэринсөбүн биллэрдэ. Кини тыйаатыр кэллэктиибин аатыттан Федот Потапов кэргэнигэр СӨ норуодунай артыыскатыгар Зоя Багынановаҕа уонна Иван Гоголев кыыһыгар, Саха тыйаатырын сүрүн худуоһунньугар Лена Гоголеваҕа сибэкки дьөрбөтүн туттарда.
Саха тыйаатырын уус-уран салайааччыта Андрей Борисов: «Федот Потапов уонна Иван Гоголев бэйэлэрин бириэмэлэрин тыйаатыр нөҥүө кэпсээн ааспыт чаҕылхай талааннаах дьоно. Кинилэр айар үлэһит уонна киһи быһыытынан доҕордоһуулара – дьикти көстүү. Оччотооҕуга бэйэлэрин көрүүлэрин, норуот сайдыытын туһунан санааларын эппиттэрэ билигин да сабыдыаллыыр. Өссө сэбиэскэй идеология күүстээх кэмигэр Дыгын Дархан туһунан «Өлүөнэ сарсыардата» диэн испэктээги туруорбуттара саха норуота хайдах сайдыан билгэлээбиттэрин туоһута буолар. Кинилэр иккиэн аныгы драматургияҕа улахан болҕомтолорун уураллара. Онон биһиэхэ билиҥҥи бириэмэ туһунан испэктээктэри туруорарбытыгар эмиэ холобур буолаллар», — диэн кылгас эрээри, чаҕылхай бэргэн этиитин көрөөччүлэр ытыс хабыллар тыаһынан биһирээбиттэрин биллэрдилэр.
Саха тыйаатыра ахсынньы ыйга Федот Потапов төрөөбүт дойдутугар Аммаҕа тахсан улуус тэрийбит декадатыгар кыттыбыта. Федот Федотович төрөөбүт күнүттэн, ахсынньы 2-тэн саҕалаан, 13 нэһилиэк норуодунай тыйаатыра Аммаҕа кэлэн испэктээк көрдөрбүттэр. Оттон Саха тыйаатыра режиссер Александр Титигиров туруорбут «Өлүү таптала» саҥа испэктээгин аан бастаан көрдөрбүтэ. Онно сүрүн оруолу оонньообут артыыс Павел Ченянов Федот Потапов аатынан бириэмийэнэн наҕараадаламмыта.
Үбүлүөйдээх декада аһыллыытыгар Саха тыйаатырын артыыстара уонна көрөөччүлэр саха норуотугар өлбөт-сүппэт айымньыларын, испэктээктэрин хаалларбыт доҕордуулар Иван Гоголев, Федот Потапов ааттарыгар уруй-айхал эттилэр.
Ааптар: Надежда Осипова.
