СӨ ОДьКХ уонна энергетика миниистирэ Дмитрий Садовников Горнай уонна Дьааҥы оройуоннарын баһылыктарын кытта көрүстэ. Манчаары Оонньууларыгар бэлэмнэнии, ууну ыраастыыр тутуу, ОДьКХ атын да боппуруостарын тула кэпсэттилэр.
Горнай баһылыга Никита Андреев Спартакиадаҕа бэлэмнэниини сырдатта. Тэрээһиннэр былааннарыгар канализационнай-ыраастыыр тэрили тутуу уонна уунан хааччыйыы киирбиттэр. Маны сэргэ Бэрдьигэстээх с. “Куорат табыгастаах эйгэтин үөскэтии” бырайыакка кыттыаҕа, манна олоҕуран Дьячковскай уулусса 6-6А дьиэтин таһынааҕы тиэргэни тупсаҕай гына оҥоруохтара. Манна 7 элбэх кыбартыыралаах дьиэ киирэр.
Дьааҥы оройуонун баһылыга Гаврил Чириков этэринэн, хаачыстыбалаах уунан хааччыйыы боппуруоһа сытыытык турар, онон Баатаҕайга ууну ыраастыыр тутуу ирдэнэр. Маны сэргэ оройуоҥҥа кэтэх ыал дьиэлэрин кииннэммит ититиигэ холбооһун тыын суолталаах. Томторго, Суордаахха уонна Хайыһардаахха хочуолунайы тутуу ирдэнэр.
Түмүккэ, Дмитрий Садовников туһааннах департамеҥҥа боппуруостары быһаарыыны көрөллөрүгэр сорудахтаата.
