Бүгүҥҥү, атырдьах ыйын 14 күнүнээҕи туругунан Афганистан, Армения, Венгрия, Германия, Испания, АХШ, Колумбия, Монголия, Македония, Канада, Индия, Иран, Финляндия, Белоруссия, Румыния, Литва, Эстония, Кытай, Эквадор, Соҕуруу Корея, Латвия, Турция, Узбекистан итиэннэ Япония хамаандалара испииһэгин ыыппыттар. Онон билиҥҥитэ омук сириттэн 113 бөҕөс кыттара күүтүллэр.
Бу күннэргэ Болгария, Молдавия, Италия, Украина, Азербайджан, Греция уонна Израиль кимнээҕи кытыннаралларын быһаарыахтаахтар. Омук тустууктарын сэргэ Дьокуускай көбүөрүгэр, өрүү буоларын курдук, дойду тустууга кииннэриттэн – Красноярскай кыраайтан, Тываттан, Бурятияттан, Дагестантан, Хотугу Осетияттан о.д.а. күүстээх бөҕөстөр кэлэн тустуохтара.
Урукку сылларга норуоттар икки ардыларынааҕы турнир алтынньы саҥатыгар ыытыллар эбит буоллаҕына, быйыл Дмитрий Петрович Коркин 90 сыла бэлиэтэнэринэн, күрэхтэһии улуу тириэньэр төрөөбүт күнүгэр — балаҕан ыйын 5-гэр “Триумф” Спорт киинигэр саҕаланыаҕа уонна 8 чыыһылаҕа түмүктэниэҕэ. Үбүлүөйүнэн сибээстээн, быйылгы турнир бирииһин пуондата 180 тыһыынча долларга тэҥнэһиэ. Кыайыылаахтар 7-лии, иккис, үһүс призердар туһааннааҕынан 5-тии уонна 3-түү тыһыынча долларынан биһирэниэхтэрэ.
Роман Попов.
