Дмитрий Коркин турнира «Триумф» спортивнай комплекса дойду бастыҥ бөҕөстөрүн муһуо. Кинилэр ортолоругар — олимпиецтар Сослан Рамонов, Сушил Кумар, аан дойду чемпиона Хаджи Алиев, Европа оонньууларын кыайыылааҕа Александр Богомоев бааллар. Бочуоттаах ыалдьытынан олимпийскай чемпион Тацухиро Енэмицу кыттыыны ылара былааннанар, диэн иһитиннэрэр СИА.
Коркин турнира алтынньы 11 — 13 күннэригэр Дьокуускай куоракка «Триумф» спортивнай комплекска буолуоҕа. СИА-ҕа спортивнай бэлэмнэнии Киинин дириэктэрэ Леонид Спиридонов иһитиннэрбитинэн, бэйэлэрин кыттар баҕаларын 25 дойду биллэрбит. Өссө алта сөбүлэҥин бэлэмниир. Ыҥырыылар 54 дойду федерациятыгар ыытыллыбыттар. Күрэхтэһиигэ Уһук Илинтэн, Санкт-Петербургтан, Москваттан, Владикавказтан кэлиэхтэрэ.
«Аан дойду таһымнаах спортсменнартан Олимпийскай оонньуулар икки төгүллээх призердара Сушил Кумар, аан дойду үс төгүллээх чемпиона Хаджи Алиев, Европейскай оонньуулар кыайыылаахтара Александр Богомоев чуолкай кытталлар, кинилэри сэргэ баҕар Олимпийскай оонньуу чемпиона Сослан Рамонов кыттыа. Азербайджан сүүмэрдэммит хамаандатыгар аан дойдутааҕы ыччат киирсиилэрин кыайыылаахтара, кэскиллээх тустууктар кэлиэхтэрэ. Кыттыан баҕалаахтар испииһэктэрэ күн түүн эбиллэ турар», — диэтэ Спиридонов.
Тустууну сэргээччилэр бочуоттаах ыалдьыт быһыытынан Япония тустуутун легендатын, Лондоннааҕы Олимпиада кыайыылааҕын, аан дойду чемпионаттарын икки төгүллээх кыайыылааҕын Тацухиро Енэмицу көрүөхтэрэ.
Саха сирин сүүмэрдэммит хамаандата толору састаабынан киириэҕэ. Арыйаан Тютрин уонна Виктор Рассадин, кинилэри сэргэ олимпийскай эрэллэр училищеларын эдэр талааннара көбүөргэ тахсыахтара, аҥардас 57 киилэҕэ дылы ыйааһыҥҥа 20-тэн тахса киһи кыттар баҕалааҕын биллэрбит. Саха сирин легионердара, Владислав Андреевтан уонна Николай Охлопковтан уратылар, бары турнирга киирсиэхтэрэ.
150 кыттааччы баар буолара күүтүллэр. Ааспыт сыллааҕы турнирга 263 бөҕөс этэ. Чемпионнар бириистэрэ 5000 доллар, үрүҥ көмүс призердар — 3000, оттон икки боруонса мэтээли кэппиттэр 2000-лыы доллары ылыахтара.
Сүрүн судьуйанан Москваттан Александр Чуенко үлэлиэ, техническэй делегатынан UWW-иан — Валерий Цыленз Белоруссияттан кыттыа. Россия регионнарыттан 16 судьуйа хабыллыа, алтата — Саха сириттэн. Аккредитациялыыр хамыыһыйа алтынньы 4 — 12 күннэригэр былааннанар.
Норуоттар икки ардыларынааҕы турнир чэрчитинэн алтынньы 10 күнүгэр научнай-практическай конференция тустууктарга уонна тренердэргэ анаан ыытыллыа.
Билиэттэр 500 — 800 солкуобай. Атыыга таҕыста.
