Режиссер Дмитрий Давыдов устубут «Пугало» диэн саха киинэтин Сочига ыытылла турар «Кинотавр» Арассыыйа киинэ бэстибээлигэр көрдөрдүлэр. КиноПоиск диэн дойду биллэр киинэ портала саха киинэтин бэстибээл биир бастыҥ киинэтинэн ааттаата.
«Отоһут дьахтар туһунан кэпсэнэр “Пугало” киинэ күүстээх өйдөбүлү хаалларда. Сахалар киһи ис туругун таарыйар гына усталлар. Саха киинэтин көрө иликтэр болҕомтоҕо ыларгытыгар сүбэлиибит», — диэн КиноПоиск эрэдээксийэтэ Telegram-ханаалыгар суруйбут.
Дмитрий Давыдов Амматтан төрүттээх. Идэтинэн – учуутал. Билигин Чапчылҕан орто оскуолатын дириэктэринэн үлэлиир. Кини «Костёр на ветру», «Ийэкээм» диэн киинэлэрэ аан дойду киинэ бэстибээллэригэр үрдүктүк сыаналаммыттара.
