29 Кулун тутар 29.03
  • -12°
  • $ 92,26
  • 99,71

Дьиэ кэргэттэр хомуска күрэстэстилэр

08:18, 25 июня 2018
Текст:
Читайте нас на
Яндекс Новости
ЯДВ

Бэс ыйын 23 күнүгэр “Үс Хатыҥҥа» Туймаада ыһыаҕа киэҥ сиринэн элбэх ыалдьыты түмэн, 36 түһүлгэнэн ырыа-тойук тардылынна. Барыларыттан тэйиччи, туора турбут сэттис түһүлгэҕэ “Хомус кырдалыгар” өрөспүүбүлүкэ араас муннуктарыттан, Абый улууһуттан тиийэ кэлэн, хомуһу доҕор оҥостубут дьиэ кэргэттэр “Хомус – дьиэ кэргэн биһигэ” диэн күрэскэ күүстэрин холоннулар.

Икки түһүмэҕинэн кыттааччылар бэйэлэрин билиһиннэрдилэр уонна хомуһу тыаһатан иһитиннэрдилэр. Абый улууһун Киэҥ Күөлүттэн сылдьар Дохунаевтар, Нам Хатырыгыттан Ефремовтар, Дьокуускай куораттан Максимовтар, Нам Хамаҕаттатыттан Калачевтар, Уус Алдан Тулунатыттан Троевтар уонна Горнайтан уон оҕолоох Дьоруой ийэ халыҥ аймаҕа, үс ыал Ефремовтар-Оконешниковтар кытыннылар.

Ефремовтар дьиэ кэргэн кийииттэрэ, улахан уол кэргэнэ:

Бу күрэскэ кыттыыны биһиги аймах эрдэттэн былааннаммыппыт уонна күүскэ бэлэмнэммиппит. 4 Ефремовтартан үһэ биир дьиэ кэргэн. Горнай улууһун Бэрдьигэстээҕиттэн уонна Солоҕонуттан сылдьабыт. Улахан уол Егор Егорович дьиэ кэргэнэ 500 киһилээх нэһилиэктэн сылдьабыт. Нэһилиэкпит кыра да буоллар, үгүс ансаамбыллардаахпыт. Кыра оҕолортон саҕалаан, улахан киһиэхэ тиийэ бары ыллыыр-туойар дьоммут. Ефремовтар олус дьоҕурдаах ыаллар. Импровизатор хомусчут ийэ удьуордара бары да хомуска оонньуу үөрүйэхтэр. Мин кийиит буоллаҕым дии, урут оонньообот эрээри, хомус эйгэлээх дьону кытта олорон, бэйэм да тардар буолбуппун.

Дьүүллүүр сүбэ быһаарыытын ылынар кэмигэр, көрөөччүлэр иннилэригэр виртуоз хомусчут Дьүрүйээнэ, Кытай иһинээҕи Монголияттан сылдьар үөрэнээччилэрэ Далай Дитеһи уонна Хуан Джайы кытта кытыннылар. Ону таһынан ХИФУ атастаһык устудьуона, дьоппуон Сатоши Кондо уонна “I speak English” үөрэх кыһатын хомуур ансаамбыла эмиэ хомус тардан көрдөрдүлэр.

“I speak English” ансаамбыла.

Кыайыылаах Троевтар.

Дьиэ кэргэн хомус ансаамбылын сөргүтүүгэ анаммыт күрэс түмүгүнэн 3-с миэстэни Дьокуускай куораттан сылдьар Максимовтар ыллылар, 2-с миэстэни Горнайтан Ефремовтар-Оконешниковтар ыллылар уонна кыайыылааҕынан Тулуна олохтоохторо Троевтар ааттаннылар.

Света Иванова, “Саха сирэ” хаһыат, edersaas.ru

0

0
Следите за самым важным и интересным в Telegram-канале и WhatsApp-группе ЯСИА