Горнай улууһун «Үлэ күүһэ» хаһыат редакцията бэҕэһээ Саха Өрөспүүбүлүкэтигэр Ньургуһун күнүгэр анаан «Ньургуйаана — Ньургуһун» диэн интерактивнай куонкурус биллэрдэ. Айар куттаах өрөспүүбүлүкэ олохтоохторун дьиэҕитигэр олорон талааҥҥытын көрдөрөргүтүгэр ыҥырар.
Горнайдааҕы «Үлэ күүһэ» хаһыат редакцията уонна улуустааҕы «Дьүрүскэн» айар куттаах ыччат түмсүүтэ Саха сиригэр тоҥ буору тобулан тахсар бастакы хорсун, күүстээх санаалаах Ньургуһуҥҥа аналлаах «Ньургуйаана — Ньургуһун» диэн өрөспүүбүлүктээҕи интерактивнай куонкуруһун саҕалаата.
«Саха норуота сөбүлүүр, ытыктыыр, сүгүрүйэр Ньуругуһун сибэккини кэнэҕэски ыччаппыт билэллэрин, кэрэхсииллэрин, умнубаттарын ситиһэр сыаллаах бу куонкуруһу ыытабыт. Муус устар 19 күнүттэн ыам ыйын 19 күнүгэр диэри онлайн ыытыллар. Айар куттаах дьон дьиэҕэ хаайтаран хаалбакка, талааннарын кэпсии-көрдөрө олороллоругар баҕарабыт«, — диэтэ хаһыат эрэдээктэрин э.т. Күннэй Алексеева.
Күрэх түһүмэхтэринэн хоһоон суруйуута, норуокка биллибит хоһоону, ырыаны толоруу, хаартысканан дьүһүйүү, илиинэн оҥоһуктар, уруһуй буолаллар.
Хоһоонноргутун, ырыаларгытын, хаартыскаларгытын, уруһуйдаргытын, оҥоһуктары түһэрэн 89241714424 нүөмэргэ📲 ыытаҕыт эбэтэр редакция электроннай аадырыһыгар Ssilatruda@mail.ru🌀
«#Дьиэҕитигэролоруҥ #чэгиэнбуолуҥ«, — дииллэр тэрийээччилэр.
