Арктикаҕа экологияҕа суоһуур мунньуллубут бөҕү суох оҥорууга эппиэтинэһи чопчулуохха уонна нормативнай-быраап баазатын ситэри оҥоруохха, диэтэ Саха сирин бырабыыталыстыбатын вице-премьерэ Денис Белозеров Санкт Петербурга ыытылла турар “Арктика: бүгүҥҥүтэ уонна кэскилэ” норуоттар икки ардыларынааҕы форумҥа.
Денис Белозеров “Арктикаҕа экологияҕа хоромньуну таһаарар мунньуллубут тобохтор: сарсын хойутуохпут” дискуссияҕа спикер быһыытынан кытынна. Вице-премьер Арктика зонатын мунньуллубут тимиртэн ыраастааһыҥҥа ыытыллар үлэ уонна ол тобохтор ханна мунньулла сыталларын туһунан кэпсээтэ.
Тыл этиитин түмүктүүрүгэр Денис Белозеров мунньуллубут тобохтор эбийиэктэрин сыаналааһын эйгэтигэр нормативнай-быраап баазатын тупсаран оҥорууга этии киллэрдэ. Ону тэҥэ форум резолюциятыгар хаһаайына суох эбийиэктэргэ ким эппиэтинэһи сүгэрин, сыаналааһын уонна хоромньуну суох оҥорууну чопчулуурга эттэ.
“Арктика: билиҥҥитэ уонна кэлэр кэскилэ” VIII норуоттар икки ардыларынааҕы форуму “Полярниктар ассоциациялара” тэрийбитэ уонна бэйэтин үлэтин Санкт Петербурга ахсынньы 5 күнүгэр саҕалаабыта.
Форум санаа атастаһар былаһаакканан буолар. Сыллата форум үлэтигэр 2000 киһи кыттар – Арассыыйа 40 регионуттан уонна 20 тас дойдуттан. 2018 сылга форумҥа бэйэлэрин этиилэрин 350 тахса спикер киллэриэҕэ.
Форум үлэтигэр Саха сирин бырабыыталыстыбатын бэрэссэдээтэлин солбуйааччы Денис Белозеров салайааччылаах Саха сирин дэлэгээссийэтэ кыттар. Дэлэгээссийэ састаабыгар айылҕа харыстабылын миниистирэ Сахамин Афанасьев, Саха сирин Арктика дьыалаларыгар Судаарыстыбаннай кэмитиэтин бэрэссэдээтэлэ Прокопий Николаев, Арассыыйа Бэрэсидьиэнин иһинэн Саха сирин Бастайаананй бэрэстэбиитэлин солбуйааччы Юрий Кравцов, норуот дьокутааттара Яков Ефимов, Елена Голомарева, Владимир Прокопьев уонна наука үлэһиттэрэ кытталлар.
СИА.
