Өрөбүл күннэргэ «Дархан Уус» Саха сирин уустарын үлэлэрин көрүү быыстапката ыытылынна. Таатта улууһуттан Сергей Тарабукин муҥутуур кыайыылааҕынан буолла уонна Борис Неустроев — Мандар Уус анал бирииһинэн наҕараадаланна.
Быйылгы уустар быыстапкаларыгар 77 киһи кытынна. Икки күн устата «Уус-уран оҥоhуулаах быhах», «Бастыҥ булт быһаҕа» уонна «Бастыҥ ас быһаҕа» диэн ааттарга кииристилэр.
Бастакы күн 58 маастар кытынна, кинилэр ас быһаҕын быһаарыстылар. Саха куукунатын маэстрота Иннокентий Тарбахов ыытта. Үһүс миэстэни Феликс Шамаев (Таатта), иккиһи — Виктор Кычкин (Чурапчы) уонна кыайыылааҕынан Сергей Тарабукин (Таатта) буолулар.
Бу күн 17 уус «Уус-уран оҥоhуулаах быhах» аат иһин кииристилэр. Дьүүллүүр сүбэ оригинальноһы, тиэмэтин арыйыы, толоруу маастарыстыбатын, матырыйаалын сыаналаата. Сергей Тарабукин Тааттаттан кыайда. Иккис Сергей Петров (Хаҥалас оройуона) уонна үһүс — Леонид Говоров (Нам улууһа).
Иккис күн «Бастыҥ булт быһаҕа» аакка 61 киһи кытынна. Дьүүллүүр сүбэ хаачыстыбатын уонна туттарга табыгаһын бэрэбиэркэлээтэ. Феликс Шамаев (Таатта) кыайда, Спартак Петров (Сунтаар) иккистээтэ, Николай Неустроев (Таатта) үһүстээтэ.
Быйылгы быыстапка духуобунас Академиятын академига, регион уустарын Сойууһун бэрэссэдээтэлэ Борис Неустроев — Мандар Уус 75 сааһын туолуутугар ананна. Уопсай түмүгүнэн үбүлүөйдээх биир дойдулаахпыт анал бирииһин Сергей Тарабукин тутта.
