Эбээн Бытантай улууһун Дьарҕаалаах нэһилиэгэ кэккэ сылларга тэтимнээх үлэтинэн-хамнаһынан, маны тэҥэ өрөспүүбүлүкэҕэ биир соҕотох мас кыырпаҕынан оттуллар киин хочуолунайынан биллэр. Кытыы нэһилиэккэ бу күннэргэ кыстык суолу баттаһа туох-ханнык үлэ ыытылларын олохтоох дьаһалта сүрүннүүр исписэлииһэ Аида Стручкова сырдатта.
2021 сылга үп министиэристибэтэ үһүс төгүлүн ыытар олохтоох көҕүлээһиннэри өйүүр куонкуруһугар Дьарҕаалаах киирсэн, бырайыактара өйөнөн, судаарыстыбаннай бүддьүөттэн 1,5 мөл. солк. эбии субсидия көрүлүннэ. Бу көрүллүбүт эбии үп, киин ититэр ситимҥэ холбонор турбалары ыларга туттуллуоҕа.
Муус устар 4 күнүгэр Дьарҕаалаахха 10-ча туонна эт бородууксуйа тиэллэн кэллэ. “Якутопторг” ынах, сибиинньэ, куурусса этин сайыҥҥы кэмҥэ нэһилиэнньэҕэ эбилик буоллун диэн быйыл бу бастакы боруобалаан көрүү быһыытынан аҕалла.
Маны тэҥэ, бу күннэргэ ити тэрилтэттэн 3 туонна эбии ас-таҥас кэлэрэ күүтүллэр, онно оҕуруот аһа, фрукта, кондитерскай астар, сымыыт, үүт бородууксуйата киирэр. Ону таһынан сылын аайы кэлэр «Саханефтегаз» таараламмыт уматыга айаннаан иһэр. Бу барыта аҕыйах ахсааннаах нэһилиэнньэлээх бөһүөлэк дьоно-сэргэтэ хааччыллыылаах буолалларыгар туруоруллубут былаан толору туолуутун көрдөрөр.
Быйыл хаһаайыстыбалар эбии окко наадыйбакка, кыстыгы этэҥҥэ туораан эрэллэр. Ынах сүөһүлээх ЛПХ тэриммит дьиэ кэргэттэргэ, биир кэлим реестрга киллэрэргэ үлэ ыытыллар.
Сири-уоту, оттуур ходуһалары кадастровай учуокка киллэриигэ, докумуон оҥоруутугар Дьокуускайтан исписэлиистэр кэлэн үлэлээтилэр. Онон, мантан инньэ ходуһалаах дьон бэйэлэрин чааһынай сирдэригэр докумуонунан бигэргэтиллибит толору бырааптаах буолуохтара.
Быйыл ититэр систиэмэ эбии турбаларын аҕалтарыытын үлэтэ салҕанар. Нэһилиэк дьиэлэрэ бары киин ититэр ситимҥэ холбоноллорун ситиһэргэ, дьаһалта баһылыга Лев Горохов кэпсэтиитин ыыта сылдьар. Ону тэҥэ, үһүс сылын олохтоохторго куорат сыанатынан тутуу матырыйаала тиэллэр. Ааспыт нэдиэлэҕэ улуус баһылыга Гаврил Горохов кэлэн инники былааннарын иһитиннэрэн, нэһилиэнньэ туохха наадыйарын билсэн барбыта, диэн суруйда “Бытантай уоттара” хаһыат https://www.instagram.com/bytantay_uottara/
This post was published on 09.04.2021 12:01 12:01