Үөһээ Бүлүү улууһун Далыр нэһилиэгин «Тускул» оҕо уһуйаанын орто уонна бэлэмнэнии бөлөх оҕолоро кыһыны ойуурга көрүстүлэр. Барыта 27 иитиллээччи төрөппүттэрин кытта Тэкэндэ эбэтигэр кыһыҥҥы көстүүнү көрдүлэр.
Далырдааҕы дьыссаат оҕолоро хаарынан сууланан турар от-мас хайдаҕын чугастан көрдүлэр, хаар халыҥын, салгын баттааһынын кэмнээтилэр. Бу сылдьан лаглайбыт күөх харыйаны киэргэтэ сылдьар Тымныы Моруос оҕонньору көрөн, олуһун диэн соһуйдулар, үөрдүлэр. Моруос оҕонньор уонна оҕолор харыйа тула хоробуоттаатылар, хоһоон аахтылар, ырыа бэлэхтээтилэр.
Моруос оҕонньор: «Саҥа дьыллааҕы бырааһынньыккытыгар өссө кэлиэҕим, онон ырыаҕытын, хоһооҥҥутун, үҥкүүгүтүн, остуоруйаҕытын бэлэмнии сылдьаарыҥ» — диэбитигэр, оҕолор сөбүлэһэн ытыстарын таһыммыттар.
Далырдааҕы оҕо уһуйаана, сылын ахсын бу маннык араас тэрээһиннэри олус сэргэхтик, уратытык ыытар, дьыл түөрт кэмин оҕо барыта илэ хараҕынан көрөр, айылҕалыын ыкса сибээс олохтоноругар иитээччилэр болҕомтолорун уураллар.
Оҕолорго үөрүүнү бэлэхтээбит төрөппүттэргэ уонна сымнаҕас олбохтоох суоппардарга Александр Евсеевка, Афанасий Семеновка, Александр Тимофеевка, Сергей Николаевка оҕо уһуйаанын үлэһиттэрэ махталларын тиэрдэллэр.
Ааптар: Валентина ДОГОЮСОВА
