Саҥа дьылга ким баҕарар туох эрэ дьиктини, кэрэни, ыра санаа туолуутун эрэнэ кэтэһэр. Ол да иһин буолуо, кини – саамай кэтэһиилээх бырааһынньыктартан биирдэстэрэ буолар. Түбэлтэтэ эрэ, чахчыта эрэ — Саҥа дьыл алыптаах түүнүгэр соһуччу дьикти түгэннэр тахсаллар. Бүгүн «Дьааҥы аартыга» хаһыат бырааһынньыктааҕы нүөмэригэр ол туһунан араас дьонтон ыйыталаспыппытын таһаарабыт. Ким итэҕэйэр итэҕэйиэ, итэҕэйбэт – бэйэтин дьыалата. Ол эрээри Саҥа дьыл дьиктилээх киэһэтэ иннибитигэр күүтэр…


Саҥа дьылга этиллибит баҕа санаа чахчы туолар. Итэҕэйиэҥ эрэ кэрэх. Ону хайдах сатыыбыт? Биир олус судургу ньыма баар: оҕоҕор түс, ыра санааҥ туоларын экчи ылын.

Наташа Стручкова, 9-с кылаас үөрэнээччитэ: Ыыннаах хайатын таастара ыраахтан дьиэ курдук көстөөччүлэр, ону Тымныы Моруос оҕонньор дьиэтэ дии санааччыбын. Билигин да уобарастары дьиҥнээх баарга олоҕуран айаллар дии санааммын, ону билигин да итэҕэйэр курдукпун. Саҥа дьыл саҕана Баатаҕайга хаайтаран олордум. Бырааһынньык саҕаланара икки чаас эрэ хаалла. Арай, биир айанньыт киирэн кэллэ, Адыаччылаан эрэр эбит этэ. Онон Адыаччылаабытым. Айылҕа суолу аспытыгар бэйэм да дьиктиргээбитим.

Анна Бурцева: Мин улаатыахпар диэри Карлсон баар дии саныырым. Эдьиийим дьээбэлээн: «Карлсон балыыһа кырыысатыгар олорор», — диэбиттээх. Ол балыыһаны ыраахтан көрдүм да, Карлсоны саныы түһэбин. Кэлин кэргэннэнэн, оҕолонон баран, биир Саҥа дьыл өрөбүлүгэр оҕом мультик көрө олордо. Аата онно: «Карлсоннаах мультигы көрүөм этэ», — диэтэҕэ үһү, наар кэпсээччибин. Арай ыалларбыт кырачааннара оонньуу киирдилэр. Кинилэр киллэрбит мультиктарын холбоотубут. «Карлсон» эбит! Бу түгэни олус дьикти дии саныыбын.

Ноа Брин: Саҥа дьылга баҕа санаа туолар диэни биирдэ итэҕэйбиттээхпин. Саҥа дьыл саҕана, 1983 сыллаахха, тимир суол вокзалын перронугар биһигини устудьуон оҕолор көрсүбүттэрэ. Кинилэр ортолоругар, саас биир дойдулаахтар көрсүһүүлэригэр сөбүлүү көрбүт уолум баара… Ол уол миэхэ утары хааман кэлбитэ уонна сүүс сыл билсэр киһитин курдук кэпсэппитэ. Билбитим, кини миигин эмиэ ол саас көрөөт сөбүлээбит эбит уонна кыбыстан кыайан чугаһаабатах. Бу соһуччу түгэн дьылҕам үтүө бэлэҕэ этэ.

Степан Слепцов: Мин оҕо эрдэхпиттэн муусуканы сөбүлүүбүн. Уол барыта гитара тутуурдаах сылдьааччы. Саҥа дьыл түүн баҕа санаа туолар диэччилэр, баҕам биллэн турар “гитара” этэ. Тэлэбиисэринэн лотерея тэҥнээһин буолла. Ким эрэ истэн этэн биэрбитин курдук — гитара сүүйдүм, дьиктиргээн бөҕө. Сотору баһыылканан ыыппыттара. Онон киһи Саҥа дьыллааҕы баҕа санаата диэн олус күүстээх эбит.

Сахая Николаева: Саҥа дьылы олус күүтэбин. Ааспыт дьылга санаабыт баҕа санаам туолбута. Бу Саҥа дьылтан эмиэ туох эрэ дьиктини күүтэ сылдьабын уонна хайаан да туолуо диэн эрэнэбин. Кэнники сылга «Карта желаний» диэни оҥоробун. Ол аата олоххо тугу баҕарарбын ватман кумааҕыга уруhуйдаан, онно сөп түбэhэр хартыыналары сурунааллартан кырыйан, хаартыскалаан сыhыарабын. Бу олус үчүгэй мотивация. Киhи сыаллаах, баҕа санаалаах олорор, туох эрэ үчүгэйгэ, кэрэҕэ тардыhа сылдьаҕын. Ол туолбута!

Киһи баҕарар баҕата, санаата санаа күүһүнэн оҥоһуллар, көстүбэт бырагыраамаҥ сынаарыйыгар киирэр дииллэр — үчүгэйи баҕардаххына – үчүгэй, эбэтэр төттөрү. Санаа диэн кээмэйэ суох, киэҥ, түгэҕэ суох үрдүк далайга айанныыр. Ол далайга ким эрэ истибитин курдук, баҕа санааҕын толорор. Ол эбэтэр, бэйэҥ санааҥ күүһүнэн тугу баҕарар кыайыахха, толоруохха сөп эбит. Ону этэн эрдэхтэрэ — «Бэйэҥ олоҕуҥ – бэйэҥ илиигэр» диэн. Саҥа дьыл күнүгэр үтүөнү баҕарыҥ, оҕо курдук үөрүҥ, дьикти түгэн баар диэн итэҕэйиҥ.

Ааптар: Боотто АСХААРАП

0
0
comments powered by HyperComments