Бу күннэргэ Дьааҥы куоратын Бабушкин уулуссатын 32-тигэр «Изабелла» маҕаhыын үөрүүлэхтик арылынна, 10 бастакы атыылаhааччы умнуллубат түгэн бэлэҕин туттулар.
Урбаанньыт дьиэ-кэргэн Елена Васильевна, Владимир Христофорович Чириковтар аныгы ирдэбилгэ эппиэттиир «Сэндвич» диэн панел матырыйаалынан тутууну улууска киэҥник ыыталлар, үлэ миэстэтин таhаараллар.
Бу маҕаhыын тутуута ыам ыйын 28 күнүттэн саҕаламмыт. Маҕаhыын олоҕун, каркааhын Киргизия икки тутааччыта, оттон ис-тас тутуутун куорат олохтоохторо Иннокентий Степанович, Валерий Иннокентьевич Рожиннар 3 аҥаар ый иhигэр
туттулар.
2010 сыллаахха арыллыбыт «Все для дома» маҕаhыыҥҥа бэрэдэбиэстээбит Изабелла Степановна Рожина маҕаhыын сэбиэдиссэйинэн ананна. Атыы-эргиэн үлэhитэ санаатын сырдатар: «Маҕаhыын арыллан 2 бэрэдэбиэс, 1 техничка, 2 хачыгаар үлэ миэстэтэ таҕыста. Маҕаhыын табаарын арааһа киэҥ буолан, нэhилиэнньэ, бэйэбит эмиэ ис сүрэхпититтэн улаханнык үөрдүбүт. Адыаччы, Боруулаах, Табалаах үүт сыахтарыттан кэлэр ас хамаҕатык барар, утары бүтэн иhэр диэххэ сөп. Кыhын убаhа, сылгы этин атыылыахпыт. Биhиги дьиэ-кэргэн сир аhын үүннэриинэн дьарыктанабыт, быйыл 3 туонна хортуоска, 500 киилэ моркуоп, 1,5 туонна хаппыыста ыллыбыт. Удамыр сыанаҕа атыыга туруорабыт«.
Александра Чемоханова, олохтоох: «Маҕаhыын куорат киинигэр туттуллубута олус үчүгэй. Биhиги кылаас Еленалаах Володянан киэн туттабыт, төрөөбүт дойдуларын сайдарыгар саңа маҕаhыыннары, үүт собуоттарын, социальнай эбийиэктэри тутан, үлэҕэ киллэрэн, үлэ миэстэтин таhааралларыттан, ону тэҥэ ыарахан ситуацияҕа түбэспит дьоҥҥо, мин уолбар көмөлөhөн тураллар, онон ийэлии махтанабын».
200 кв иэннээх эконом-маркет маҕаhыын аана сабыллыбат, сыаната удамыр буолан ыччат, оҕо-дьон сөбүлээн атыылаhар.
