Дьааҥы оройуонун киин бибилэтиэкэ уопсай отделын үлэhитэ, бибилэтиэкэр Евдокия Ивановна Юмшанова «Россия үс өҥнөөх былааҕа» диэн бүтүн Арассыыйа үрдүнэн ыытыллыбыт аахсыйа чэрчитинэн, дойду былааҕыгар сүгүрүйүү бэлиэтинэн хоhоон ааҕыытын онлайн күрэҕин тэрийэн ыыппыта түмүктэннэ. Күрэх ыччат, үүнэр көлүөнэ Арассыыйа былааҕын дьиҥ устуоруйатын, дьылҕатын билиилэригэр уонна хоhоону ааҕыы ускуустубатын үрдэтиигэ олоҕуран ыытылынна. Кыттааччылар араас ааптардар хоhооннорун икки тылынан бэрт таhымнаахтык аахпыттарын дьүүллүүр сүбэ бэлиэтээтэ.
«Урут тэрээhиннэр маннык форматынан ыытыллар быраактыкалара суох буолан дьон видеоролигынан ааҕыыттан саллар, онон хорсуннар уонна көрөөччү иннигэр толорор үөрэхтээх дьон улгумнук кытынна. Инникитин онлайн тэрээhин элбэх буолуо«, — диир Евдокия Ивановна.
Улахан дьоҥҥо Арыылаах орто оскуолатын учуутала Слепцова Розалия Степановна бастаата. Иккис миэстэҕэ Васильева Варвара Альбертовна, үһүскэ Горохова Любовь Контваровна эрэллээхтик таҕыстылар диэн дьүүллүүр сүбэ бэлиэтиир.
Оҕолор бөлөхтөрүгэр Дьааҥы куоратын үөрэнээччитэ Харчылаах Арсен бастаата. Баатаҕайтан 8 саастаах Чириков Миша инникилээх ааҕааччы буоларын көрөөччү сэргиэн сэргээтэ. Оттон Мэҥэ-Хаҥалас Майатыттан Михайлова Күннэй олус дьоhуннук кыттан, күрэх далааhынын кэҥэппититтэн Дьааҥы дьоно үөрдүлэр.
Кыайыылаахтар Киин библиотечнай систиэмэ дириэктэрэ илии баттааhыннаах кырааматалары, туоhу суруктары туттулар.
«Билиҥҥи балаhыанньаҕа дьон-киhи өйө-санаата эрэ буолбакка, аныгы олох тутула бэйэтин кэмигэр сөп түбэhэр ньымаларынан, хайысхаларынан салайтаран инники хардыылыырын билиннибит«, — диир ааҕааччы Мария Стручкова.
Раиса Чирикова
