В.П.Ларионов аатынан хоту дойду олоҕун-дьаһаҕын кыһалҕаларын чинчийэр физико-техническэй институт бөлөҕө Дьааҥы улууһугар пеллет (биотопливо) көмөтүнэн оттук тула кэпсэтии ыытта.


Бөлөххө институт энергетикаҕа проблемаларын чинчийэр отделын сэбиэдиссэйэ Павлов Никита Влалимирович, научнай үлэһит Захаров Василий Егорович, ГУП ЖКХ производственнай-техничэскэй отделын сүрүн специалиһа Вензель Виктор Егорович кэлэн үлэлээтилэр.

Чинчийээччилэр ГУП ЖКХ «пеллетинэн үлэлиир  собуоту тутуу» диэн идеятын өйөөн үлэлэһэ кэлбиттэрин уонна Аартыка министиэристибэтин сакааһынан научнай үлэҕэ кыттыhан, бу пилотнай бырайыак сүнньүнэн үс күн үлэлээтилэр.

Үлэ соругунан, «Дьааҥы оройуона» МТ баһылыгын Гаврил Ильич Чириковы кытта көрүстүлэр.  Пеллет (биотопливо) ньыматынан оттуллар собуоту Дьааҥыга тутуу тыа сирин олоҕун-дьаһаҕын үгүс кыһалҕаларыттан босхолуохтааҕын туһунан киэҥ кэскиллээх кэпсэтии ыытылынна. Баһылык Гаврил Ильич нэһилинньэни итиинэн хааччыйыы биир инники турар боппуруос буоларын тоһоҕолоон туран, пеллетинэн үлэлиир собуот тутуллуон сөптөөҕүн эттэ.

Захаров Василий ЕгоровичПеллетинэн оттунуу салгыны киртиппэт, экология өттүнэн ыраас буолар.  Кини гааһынан үлэлиир оһохтор курдук автоматикалаах, тупсаҕай, киинтэн тардыллар ититэр ситимтэн сылааһы биэриитэ уратыта суох буолар. Бастакы барыллаан көрөөһүммүтүнэн пеллетинэн барар оһох эффективнэһэ лаппа үрдүк, уонна пеллет оҥорорго мас төбөтө, мутуга хаалбакка барыта туһаҕа тахсар буолан, маhы кэрдии билиҥҥиттэн 2 бүк тиийэ кыччыан сөп. Манна сүрүн боппуруос мас саппааһыгар уонна хаачыстыбатыгар сытар. Элгэс уонна Боруулаах нэһилиэктэригэр ойуур-тыа туругун илэ бэйэтинэн кэлэн көрөн, мас учуотун ааҕан-суоттаан, бу пилотнай проекпыт сүнньүнэн төһө мас туттуллуохтааҕын суоттуохтаахпыт. Чинчийии барылынан ылбыт бастакы көрүүлэрбитинэн бырайыагы үөрэтэн, оҥорон баран бэйэбит чааспытыгар — ГУП ЖКХ биэриэхпит, кини тиһэх быһаарыыны ылынан, бэйэтин көрүүлэринэн бырайыагы чопчулуоҕун эмиэ сөп«.

Дьааҥы оройуонун олох-дьаһах хаһаайыстыбатын сүрүн исписэлииһэ Александр Христофорович Элгэс, Боруулаах нэһилиэктэригэр бөлөҕү арыаллаан сылдьыста. Уу мотуорунан сылдьан Элгэс тоҕойдорун көрөн, ойуурун маһа аччаабытын,  синньигэстэрин, олохтоохтор мастарын түөртүү көстөөх сиртэн кэрдэн тиэниигэ, тырааныспарга да үгүс кыһалҕалары көрсөллөрүн эттэ. Маны кытта, Боруулаах маһын киэҥ сиринэн көрөн, мас бөдөҥ эрээри чугаһынан аҕыйаабытын, дьон мастарын бэрт ыраах сиртэн тиэнэллэрин биирдиилээн дьону кытта кэпсэтии түмүгүнэн сырдатта.

Сылтан сыл ахсын ойуур-тыа баһаардарыттан ыксаллаах быһыы-майгы үөскээн оттор маска кыһалҕалар бааллар. Онон пеллетинэн оттуу киириитэ дьон олоҕун-дьаһаҕын кыһалҕаларын биллэ аччатыан сөп.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.