Дьааҥы улууһун Арыылаахтара (Балалар) окко киирдилэр. Быйыл былырыыҥҥытааҕар от үүнүүтэ үчүгэй диэн дьон санаата бөҕөх.
Нэһилиэк баһылыгын солбуйааччы Руслан Николаевич Слепцов: “ Бастакы оччуттар — 5 киһилээх биригээдэ үтүө күннэри баттаһа, Даалҕаан учаастагар тахсыбыттара. Биирдиилээн хаһаайыстыбаларга — ПК Арыылаах сылгыһыттара — 5 киһи, сирдэригэр от үүммэккэ, бөһүөлэктэн саамай ыраах сытар 170 килэмиэтирдээх Аллаах учаастагар тахсан оттуу сылдьаллар. Оттон 120 км. тэйиччи сытар Кэрбэҥнээххэ үс киһи оттуур. Үксүлэрэ биирдиилээн хаһаайыстыбалар уонна М.А. Ефимова, О.Н. Бойко, В.Н.Слепцов бөдөҥ бааһынай хаһаайыстыбалара оттууллар. «Үчүгэй» учаастак да тэйиччи, онно 5 киһи; «Торбос» учаастагар 2; Эбэйгэ – 1; Курбаҥҥа 6 ; Үөттээх учаастагар 4 киһи, уонна, саамай чугастара – 30 килэмиэтирдээх Тарҕана учаастагар 6 киһи оттуу сылдьаллар».
Саас кыһыҥҥы суолу баттаһа олохтоохтор 12 помпаны сакаастаан, сир оҥоһуута балай эмэ ыытыллыбыта. Онон быйыл былырыыҥҥытааҕар от үүнүүтэ үчүгэй диэн дьон санаата бөҕөх.
Саастаах оччуттар аныгы «штиль» диэн от охсор косилканы туттар үөрүйэхтэрэ суох, онон күн уотугар мөһүүрэлэнэн көстөр хотуур тыаһа ходуһаны уруккулуу киэргэтэр. “71 саастаах Егор Петрович Слепцов, 72 саастаах Иннокентий Петрович Слепцов уонна Эбэй учаастагар оттуур 86 саастаах сылгы тутар Афанасий Дмитриевич Ефимов хас сайын ахсын 20 туонна оту илиинэн оттоон туттараллар», — диэн Руслан Николаевич сөҕө кэпсиир.
Арыылаахтар былырыын от былаанын 50% толорбуттара, быйыл 70% туолуоҕун сөп диэн сибиккилииллэр.
