Ааспыт сыл Дьааҥы улууһугар ойуур баhаардара оттооhуҥҥа хааччахтары үөскэппит эбит буоллахтарына, быйыл коронавирус пандемията кэккэ кыhалҕалары аҕалла. Ол да буоллар  от үлэтэ көхтөөхтүк баран иhэр.


Верхоянскай куорат «Полюс Холода» ТХПК иhинэн үлэлиир «Алгыс» ферма салайааччыта Екатерина Алексеевна Портнягина Остоолбо Улахан сыhыытыттан арендалаан  оттуу сылдьар. Бу сайыҥҥы окко улуус үрдүнэн хаhааҥҥытааҕар да элбэх киhи окко таҕыста. Коронавирус дьаҥыттан сайынын соҕуруу барбакка, төрөөбүт дойдуга кэлии элбэҕэ бэлиэтэнэр.

— Верхоянскай орто оскуолатын 10-нус кылааhын оҕолорун 8 уолу илдьэ сылдьан оттоон испиппит, онтон короновируска карантин диэн биричиинэнэн тохтоппуппут. Оҕолор үлэлииргэ баҕалаахтар. Быйыл үhүс сыллара, онон оттуурга  үөрүйэхтэр. Лидэрдэрэ Кеша Васильев. От үлэтэ диэн тугун билэн, аны охсооччу быhыытынан сылдьар. Быйыл сайын эбэлээх, эhэтигэр Ефимовтарга оттоhон баран биhиэхэ кэлбитэ.

— Ааспыт кыстыгы туоруурга ыарахан кэм ааспыта. Быйыл окко былааҥҥытын толоруох курдуккут дуо?

— Кэккэ ыарахаттары көрүстүбүт, саамай элбэх оту Күүлэй тэрийэн ситиhээччибит. Быйыл пандемияннан сибээстээн, бопсоннор тэрийбэтибит.

Үчүгэйэ диэн быйыл прессподборщик ылан үлэлэппиппит төрдүс хонуга, күҥҥэ 100 рулону онорор. Ол аата 3 тонна, бэҕэhээ 2 хонуктаах 200 рулуону — ол аата 6 тоннаны куоракка тиэйбиттэрэ.

Уонна тыраахтарга соhуллар кыраабыл ылбыппыт, ону эмиэ үлэлэтэбит.

Маннык үлэлээтэхпитинэ  оппут тиэйиитигэр да, кээмэйигэр да быдан экономияланыыһыбыт диэн астынныбыт. Урут кээспит оппутун тутарга мөккүhүү тахсар эбит буоллаҕына, билигин туонната чуолкай биллэр, ынахтарга биэрэргэ сүөсүhүттэргэ да быдан чэпчэки уонна түргэн буолар.

— Туhалаах тэрил баар буолбута оттооhуңңа кырдьык олус абыраллаах эбит. Прессподборщиккытыгар ким үлэлиирий?

— Дойду сиригэр элбэхтик үлэлээбит, тыа хаhаайыстыбатын ветеранын, Чурапчыга Мэлдьэхси нэhилиэк баhылыгынан үлэлээбит Портнягин Николай Васильевиhы дуогабарынан үлэлэтэ сылдьабыт. Үлэбит түмүктээх буолуоҕа диэн эрэнэбит. Онон Николай Васильевичка махталбыт улахан.

— Бу кэлэр бэнидиэнньиктэн ардах түhүө дииллэр, онон окко күнү былдьаhыы буолан хойукка диэри оттуургут буолуо?

—  Пресстэммит оту тута  массыынаҕа тиэйэллэр. Остуолбаттан Олег Слепцов, технолог Анна Ефимова, Николай Портнягин, Дария Стручкова, Христина Слепцова, оту куруустааччы 10-нус  кылаас үөрэнээччитэ Женя Ефимов уонна да атын төhүү отчуттар бааллар. Онон күүс, кыах баарынан оттуубут.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.