Саудовскай Аравияттан Дьааҥыга кэлбит 8 киhилээх бөлөх бэҕэһээ 10.40 ч. Баатаҕай — Верхоянскай куорат хайысханан айаннаата. Кумах куйаар дьоно тымныыны уонна хоту сиргэ күн эргиирэ уратытын ордук сэргээтилэр.
Дьааҥыга күн саhарҕата быгыыта, күн күөрэйиитэ, саhыыта Саудовскай Аравия туристарын итэҕэллэригэр ураты суолталааҕын этэллэр. Ыалдьыттар аара тымныыны кээмэйдээтилэр. Баситакы тохтобулга 56,6 көдөрдө, биэс хаамыы тэйиччи эмиэ атын намыhах температураны бэлиэтээтилэр. Оттон термомердарын хаар диэки даҕайдахтарына — 78 С тиийэ намтыыр.
Баатаҕайтан 20 килэмиэтирдээх «Харысхал» лааҕырын тохтобулуттан кэккэлэhэн турар уонча ураhа быhыылаах сайыҥҥы оҕо сынньанар эбийиэктэрин тутууларын көрдүлэр.
Верхоянскай дьаhалтатын баhылыгын солбуйааччы Михаил Иванович Игнатьев араб дьонун итии чэйдээх көрсөн, куорат туhунан кэпсээтэ. Бөлөх дьоно бэлиэ миэстэлэргэ өйдөбүнньүк хаартыскаҕа түстэ.
Кумах куйаар дьоно тыа сахатын курдук боростуойдарын, көңүллэрин уонна холкуларын олохтоохтор бэлиэтээтилэр. Таңастара чарааhыттан тоңо быhыытыйдаллар да, 60-ча кыраадыс тымныыны син тулуйдулар.
Киирбэт күннээх сайыннаах, чысхааннаах тымныылаах хоту дойдуга анаан-минээн кэлбит дьон сиэринэн тэйиччи турар метеостанцияҕа сатыы хааман тиийдилэр. Кинилэр тымныыны кээмэйдиир тэриллэрэ уонна метеостанция таhаарар кээмэйэ уратылара суоҕун тылбаасчыт Василий Кувшинов кэпсээтэ.
2016 сыллаахха Олоңхо ыhыаҕа ыытыллыбыт Хоптолооҕор сырыттылар. Бөлөх салайааччыта Dkil Almatrfi киирбэт күн хайдах эргийэрин көрүөн баҕалааҕын эттэ.
Дьааҥы историятыгар кумах куйаар дойдуттан аан бастаан кэлбит ыалдьыттар
олохтоотор ыалдьытымсахтарын, ис киирбэхтэрин, тулуурдаахтарын, маннык тымныыны хайдах тулуйан олороллорун сөҕө этэллэр.
Михаил Иванович «Төрөөбүт дойдубутуттан барбаппыт, биhиги үгэспит, төрүппүт, култуурабыт барыта манна баар», — диэн истиҥник хардарбытын бары да астына иhиттилэр.
Ааптар: Раиса Чирикова
