Бүлүү улууһугар 250 сыллаах үбүлүөйүн бэлиэтиир Дьөккөн нэһилиэгэ 2021 сылы «250 Үтүө санаа сылынан» биллэрбитэ. Олохтоохтор ураты суолталаах сылларын үөрүүлээхтик арыйдылар.
Нэһилиэк аҕа баһылыга Егор Степанов 250 сыл устата Дьөккөн нэһилиэгэр өрөспүүбүлүкэҕэ да, улууска да киэҥник биллэр элбэх дьон төрөөн-үөскээн, үөрэнэн-үлэлээн ааспыттарын бэлиэтээтэ. Ол курдук 2020 сылга төрөөбүтэ 100 сааһын туолбут Сэбиэскэй Сойуус Дьоруойа Николай Алексеевич Кондаков, ааспыт сылга 110 сааһын туолбут Социалистическай Үлэ Дьоруойа Алексей Николаевич Черканов, Аар айыы үөрэҕин төрүттээччи, саха эмчитэ, суруналыыс Владимир Алексеевич Кондаков, ону сэргэ бу сылга төрөөбүтэ 125 сааһын туолуохтаах, Дьөккөн оскуолатын төрүттээччи, биллэр судаарыстыбаннай деятель, салайааччы, Саха Өрөспүүбүлүкэтигэр биир бастакы большевик, революционер Степан Филиппович Гоголев.
2021 сыл Саха Өрөспүүбүлүкэтин Ил Дарханын дьаһалынан Чэбдигирии сылынан биллэриллибитинэн, баһылык Дьөккөн нэһилиэгин фельдшерскэй-акушерскай пуунун үлэһиттэрин бүтүн нэһилиэк дьонун аатыттан эҕэрдэлээтэ, ааспыт сылга кинилэр сыралаах үлэлэрэ үрдүктүк сыаналаммытын бэлиэтээтэ уонна «Дьөккөн нэһилиэгин социальнай-экономическай сайдыытыгар киллэрбит кылаатын иһин» бэлиэни 27 сыл устата фельдшеринэн үлэлии сылдьар Корякина Таисия Лазаревнаҕа үөрүүлээх быһыыга-майгыга туттарда.
Хамсык дьаҥа сытыытык туран, ааспыт сылга былааннаммыт үбүлүөйдээх тэрээһиннэр быйыл ыытыллалларыгар эрэнэрин салайааччы биллэрдэ.
Источник: #олохсуола #вилюйскийулус #вилюйск
