Таатта улууһугар Чычымахха ураты сэргэх күн буолла. Тыа сирин тупсарыы сылынан механизатордар тутуу маһын киллэриигэ субуотунньук-күрэхтэһиигэ күөн көрүстүлэр. Манна 8 тырахтарыыс, 4 куруусчут кытынна. Бу туһунан «Айылгы» СК дириэктэрэ Марианна Решетникова иһитиннэрдэ.
«Сарсыардаттан дьон-сэргэ санаата өрө көтөҕүллэн, сэргэхсийэн түмсүбүтэ бырааһынньыктыы настарыанньаны үөскэттэ. Мустубут бар дьон ортотугар олоҥхоһут, алгысчыт Алексей Николаев аал уоту оттон үлэ-хамнас үтүө түмүктэрдээх буоллун диэн арыылаах алаадьынан, саламаатынан айах тутан алҕаата. Ох курдук оҥостубут күрэстэһээччилэргэ нэһилиэк баһылыга Степан Соров ситиһиилэри баҕарда, төрөөбүт дойдуларын туһугар ис сүрэхтэриттэн кыһаллан үлэлиир дьонноох нэһилиэк сайдан, кэҥээн иһэригэр эрэнэрин биллэрдэ. Ол кэннэ күрэх саҕаламмытын биллэрэн кыһыл былаах күөрэс гынаатын кытта үлэҕэ миккиллибит тырахтарыыстар тимир көлөлөрүгэр сүүрэн тиийэн олоро түһээт, икки көстөөх Чолообура диэн сиргэ түһүннүлэр”, — диир Марианна Константиновна.
Дьону-сэргэни сомоҕолуур бэртээхэй тэрээһиҥҥэ нэһилиэккэ өр сылларга үрдүк таһаарыылаахтык тырахтарыыстаабыт киэн туттар ытык кырдьаҕастара, тыыл бэтэрээннэрэ Наум Малышев, Роман Михайлов, Василий Новгородов, Федот Андросов, Трофим Иванов, Егор Иванов ааттарынан анал бириистэри кинилэр дьиэ кэргэннэрэ, оҕолоро-уруулара туруорбуттар. Маны сэргэ, туруу үлэһит Федот Андросов аатын үйэтитэн кыыһа Нина Саввина көһө сылдьар кубок олохтообут.
Күүрээннээх күрэхтэһии түмүгүнэн 170 мас бэлэмнэниллибититтэн 129 мас киллэриллибит. Олору нэһилиэккэ дьон сылдьар суолун-ииһин, тротуары оҥорууга, палисадниктары, күрүөнү-хаһааны тупсарыыга туттуохпут диэн үөрэллэр.
Түргэн-тарҕан туттунуулаах туруу үлэһит тырахтарыыстар илин-кэлин түсүһүүлэрин түмүгэр кыайыылаахтарга махтал суруктар, бэртээхэй бириистэр туттарыллыбыттар. 1 миэстэни Семен Васильев ылан Наум Малышев анал бирииһин тутан уонна 100 л. сэлээркэҕэ тиксэн улаханнык үөрбүт. Иккискэ Аркадий Миронов (Ф.Андросов анал бирииһэ, 50 л. сэлээркэ), үһүскэ Аркадий Софронов (Т.Иванов анал бирииһэ, 50 л. сэлээркэ) тахсыбыттар. А.Малышевка «Уйгу» маҕаһыынтан 3000 солк. сертификаты нэһилиэк дьаһалтата бириис быһыытынан туттарбыт. А.Шепелев Р.Михайлов бирииһинэн газ плитанан наҕараадаламмыт. В.Захаровка “1000 бытархай” маҕаһыын бирииһэ – тиэримэс, П.Канаевка В.Новгородов туруорбут газ плитата, В.Богдокумовка Е.Иванов бэлэмнээбит 2 куул эбиэһэ ытыс тыаһыгар доҕуһуолланан туттарыллыбыттар.
Чычымахтар тэрээһин сэргэхтик барбытыттан улаханнык үөрэн, астынан туран куруук өйөбүл, тирэх буолар дойдулаахтарыгар Андрей Поповка, Сергей Софроновка, Андрей Варламовка, «Толоон» (дириэктэр Прокопий Рахлеев), «Тааттаавтодор» ААУо (дириэктэр Иван Бочонин) махтаналлар.
