Чыамайыкы нэһилиэгэ быйыл 110 сыллаах үбүлүөйүн бэлиэтээтэ. Бу кэрэ-бэлиэ сылга үгүс үтүө тэрээһин ыытылынна. Биир оннук умнуллубат дьаһалынан модульнай фельдшерскэй-акушерскай пуун уонна эдэр исписэлиистэргэ 4 кыбартыыралаах олорор дьиэ үлэҕэ киллэрилиннилэр.


Фельдшерскэй-акушерскай пуун федеральнай уонна өрөспүүбүлүкэтээҕи бырагыраамаларынан үбүлэнэн тутулунна. Тутууну “Основа” ХЭО тутуу хампаанньата (генеральнай дириэктэр Юрий Попов,  кылаабынай прораб Евгений Илларионов) ыытта. Пуун аныгы ирдэбиллэргэ эппиэттиир медицинскэй тэриллэринэн толору хааччылынна. Үс үлэһиттээх. Сэбиэдиссэй Саталина Дьячковская, биэлсэр Ульяна Черноградская, санитарка Мария Дьячковская аныгылыы тупсаҕай оҥоһуулаах пууҥҥа үлэлиир кыахтаннылар.
Түөрт кыбартыыралаах олорор дьиэ нэһилиэккэ үлэлиир эдэр исписэлиистэргэ ананан “Мин Сахам сирэ ‒ XXI үйэҕэ” өрөспүүбүлүкэтээҕи үтүө дьыала хамсааһынын дириэксийэтин үбүлээһининэн тутулунна. Тутууну “Форас” ХЭУо (генеральнай дириэктэр Алексей Слепцов) икки сыл устата тутан үлэҕэ киллэрдэ. Киин хочуолунайтан ититиллэр саҥа дьиэ уопсай иэнэ ‒ 136 кв.м. Кыбартыыраларга нэһилиэккэ үлэлиир эдэр исписэлиистэр ‒ биология учуутала Христина Егоровна, нэһилиэк дьаһалтатын буҕаалтыра Альберт Егорович Софроновтар, ФАП санитарката Мария Николаевна, нэһилиэк электригэ Эдгар Дьячковскайдар, бэтэринээр быраас Татьяна Егоровна, үүт технолога Роман Толстоуховтар уонна биир кыбартыыраҕа оскуола эдэр учууталлара  Гаввар Ринатович Каримов, Михаил Егорович Варягин, Николай Янович Максимов киирдилэр.
Саҥа дьиэлэри үлэҕэ киллэрэр дьоро күннэригэр улуус дьаһалтатын тэрийэр үлэҕэ отделын начаалынньыга, нэһилиэк куратора Гаврил Семенов, тыа хаһаайыстыбатын управлениетын начаалынньыга Иннокентий Семенов, улуус кылаабынай бырааһа Алексей Павлов, СӨ доруобуйа харыстабылын министиэристибэтин  инженернэй отделын начаалынньыга Иван Михайлов, “Основа” ХЭО генеральнай дириэктэрэ Юрий Попов кытыннылар. Ыраахтан-чугастан кэлбит ыалдьыттар уонна нэһилиэк баһылыга Егор Прокопьев олохтоохтору саҥа дьиэлэр үлэҕэ киллэриллиилэринэн эҕэрдэлэрин тириэртилэр, тутууга үлэлэспит дьоҥҥо Махтал суруктар туттарылыннылар.
Быйылгы сылы саҥа дьиэлэр малааһыннарынан түмүктээн нэһилиэк дьоно-сэргэтэ сүргэтэ көтөҕүллэр.
Ааптар: «Эркээйи» хаһыат, Мэҥэ Хаҥалас улууһа

Сигэн:

0
0

Хоруй суох