29 Кулун тутар 29.03
  • -15°
  • $ 92,26
  • 99,71

Чурапчыга элбэх кыбартыыралаах саҥа дьиэлэр хаһаайыттара күлүүстэрин туттулар

14:50, 07 сентября 2018
Текст:
Читайте нас на
Яндекс Новости
ЯДВ

Урукку сылларга “МАКРОС” хааччахтаммыт эппиэтинэстээх тэрилтэҕэ албыннатан, дьиэ туттарыыга дуогабардаспыт 28 ыал  илии соттон хаалбыта. Ити кыһалҕаны өрөспүүбүлүкэ Бырабыыталыстыбата уонна Чурапчы улууһун дьаһалтата өйдөөн, үбүлээһинин боппуруоһун быһааран, үлэ салгыы ыытылларын ситистилэр. Ол курдук, өр кэмнэргэ тохтотуллан турбут үлэ салҕанан, былырыын 2017 сыл сэтинньи ыйын 14 күнүгэр, кластер территориятыгар бастакы түөрт квартиралаах саҥа таас дьиэ олоххо киирбиитэ. Оттон бүгүн, балаҕан ыйын 7 күнүгэр өссө икки саҥа дьиэ арыллан 8 ыал күлүүс тылын туттулар.


Саҥа дьиэлэр арыллыыларыгар СӨ тутуу уонна архитектура отделын сүрүн исписэлииһэ С.А. Никитина, “Олох-дьаһах, тутуу комплекс” оҥорон таһаарар коммерческэй фирма салайааччыта И.П. Федулов, Чурапчы нэһилиэгин баһылыга С.А. Саргыдаев, “Надежда” олох-дьаһах, тутуу кооперативын бэрэссэдээтэлэ Р.Р. Барашкова кыттыыны ыллылар.

Оччолорго сүрдээх уустук балаһыанньаҕа үлэни саҕалаабыттар. Ордук сокуон өттүнэн, барытын төттөрү көтүрэн баран саҥаттан таҥыыга үгүс мэһэйдэри көрсүбүттэр. Итиннэ барытыгар үлэлэспит юрист Василий Хомподоев, улуус баһылыгын тутуу боппуруостарыгар солбуйааччы Руслан Васильев, итини таһынан гааз ситимэ холбонуутугар күүс-көмө буолбут Александр Дьячковскай уонна маннык үчүгэй, хаачыстыбалаах тутууну кылгас кэм иһигэр үлэҕэ киллэрбит Иван Федулов буолаллар.

“МАКРОС” тэрилтэ тутуохтаах дьиэлэрин боппуруоһа өр сылларга дьону-сэргэни эрэйгэ тэппитэ. Бу маннык өйдөммөт быһыыттан Чурапчы улууһа, куһаҕан дьыала рейтинигэр Дьокуускай куорат кэнниттэн иккис миэстэҕэ сылдьыбыта. Антонина Николаевна Слепцова, Чурапчы нэһилиэгин олохтооҕо, улуус киин балыыһатын үлэһитэ, саҥа кыбартыыра хаһаайката: “Инньэ 2012 сылтан быһа ыар сүгэһэр оҥостубут санаабыт бүгүн олоххо киирэн үөрүүбүт муҥура суох. Наһаа ыарахан, хомолтолоох күннэр аастылар. Бэйэм дьиэм үс хостоох, толору хааччылыылаах. Эбии гааз ситимэ тардыллан күөх төлөн умайда, туспа 10 суотай уһаайбаланныбыт. Барыта санаа хоту буолан олус үөрдүбүт. Үлэлээбит дьоҥҥо бары үтүөнү, үгүс ситиһиини, кыайыыны-хотууну баҕарабыт!”

Бүгүҥҥү күҥҥэ олохтоохтор бырааптара толору көмүскэннэ, саҥа дьиэҕэ киирэр үөрүүлээх күннэринэн эҕэрдэлиибит.

Ааптар: Семен ЖЕНДРИНСКЭЙ.

Следите за самым важным и интересным в Telegram-канале и WhatsApp-группе ЯСИА