29 Кулун тутар 29.03
  • -10°
  • $ 92,26
  • 99,71

Чурапчыга бойобуой дьайыылар бэтэрээннэрэ интернационал-буойуттары кэриэстээтилэр

16:26, 17 февраля 2020
Текст:
Читайте нас на
Яндекс Новости
ЯДВ

Оруобуна 30 сыл анараа өттүгэр, олунньу 15 күнүгэр, сарсыарда 10 чаас 30 мүнүүтэҕэ Адмуртьянан ааһар муостанан байыаннай тиэхэньикэ бүтэһик холуонната ааспыта. Түгэх иһэр БТР-га 40-с аармыйа хамандыыра, генерал-лейтенант Борис Громов бэйэтинэн олороро. Ол саҕанааҕы көрдөрөр-иһитиннэрэр хампаанньалар уһустубут хаадырдара аан дойдуну биир гына тилийэ көппүттэрэ.


Кырыктаах, уодаһыннаах сэриигэ  Сэбиэскэй Сойуус мөлүйүөн аҥара саллаата кыттыыны ылбыта. Олортон, хомойуох иһин, 14 тыһыынча саллаат сырдык тыына быстыбыта. “Афганец” диэн тыл биһиги дойдубутугар туспа, ураты өйдөбүлү ылбыта. Ол да иһин, үгэс быһыытынан, дойду “афганецтара” бука бары түмсэн, ол уордаах сэриигэ олохторун толук уурбут, хорсуннук өлбүт доҕотторун ахтан-санаан, кэриэстээн, кинилэргэ анаммыт пааматынньыктарга, монуменнарга сибэкки дьөрбөтүн, чүмэчи уураллар.

СӨ Ис дьыала уорганнарын уонна войскаларын бойобуой дьайыылар бэтэрээннэрин Ассоциациятын бырабылыанньатын бэрэссэдээтэлэ, полковник Николай Гребенников олунньу 12 күнүнээҕи 1 №-дээх “Интернационал буойуттар күннэринэн” биллэрбит дьаһалыгар олоҕуран, Чурапчы улууһун бойобуой дьайыылар бэтэрээннэрин уопсастыбаннай түмсүүтэ (бэрэссэдээтэл Илья Березкин), итиэннэ Афганистан сэриитин бэтэрээннэрэ Савелий Дьячковскай, Николай Беляев олунньу 15 күнүгэр Чурапчыга былырыын оҥоһуллубут “Долг. Честь. Мужество” монумеҥҥа тиийэн сибэкки дьөрбөтүн уурдулар.

Мустубут дьоҥҥо туһаайан, СӨ Ил Түмэнин дьокутаата, саппаас хапытаана Семен Никитин, Чурапчы нэһилиэгин дьаһалтатын сүрүннүүр исписэлииһэ Андрей Дьячковскай тыл эттилэр, Афганистан сэриитин бэтэрээннэригэр нэһилиэк дьаһалтатын аатыттан өйдөбүнньүк бэлэхтэри туттардылар.

Ааптар: Сэмэн Жендринскэй, Чурапчы

Следите за самым важным и интересным в Telegram-канале и WhatsApp-группе ЯСИА