Чурапчы сэлиэнньэтигэр Ленин уулуссатыгар 15 кыбартыыралаах олорор дьиэни өлүүлэһэн тутууну ыытар “Иитии” биэнсийэлээхтэр көҕүлээһиннэрин өйүүр регионнааҕы уопсастыбаннай фонда үлэһиттэригэр холуобунай дьыала тэриллибитин туһунан өрөспүүбүлүкэ борокуратуурата иһитиннэрэр.
Дьиэни үлэҕэ киллэрии бастакы болдьоҕо 2016 сыл ахсынньытыгар былааннаммыта, онтон хаста даҕаны көһөрүллүбүтэ. Билигин дьиэни тутуу тохтоон турар.
“Тутааччы дуогабардары судаарыстыбаннайдык регистрациялаппакка эрэ дьонтон харчыны ылбыта. Киирбит үптэн дьиэни тутууга сорҕотун эрэ ыыппыттара. Киирбит үп сорох чааһа фонда тутууну кытта сибээһэ суох иэстэригэр барбыта, ол иһигэр кирэдьииттэри сабыыга”, — диэн борокуратуура релиһигэр суруллар.
СИА.
