Чурапчы Арыылааҕар олохтоох көҕүлээһини өйүүр бырагырааманан спорт саалатын саҥардаллар.
Арыылаах нэһилиэгэ бырагыраамаҕа 2017 сыллаахтан кыттар. Бастакы икки сылга олохтоохтор күүстэринэн тутуллубут спортсаала дьиэтин сылыппыттар. Билигин икки грант көмөтүнэн ититии ситимин тупсарыахтара уонна саала иһин өрөмүөннүөхтэрэ.
Нэһилиэк баһылыга Николай Сыромятников бырагырааманан көрүллэр грант үбүн нэһилиэк кыһалҕатынан көрөн тыырары этэр. Билигин үп нэһилиэк олохтооҕун ахсаанынан бэриллэр.
Аныгыскыга олохтоохтор 1899 сыллаахха тутуллубут Николаевскай таҥара дьиэтин толору өрөмүөннүүр баҕалаахтар. Былыргы тутууну харыстыыр сыалтан Арыылаахтар дьиэни бэйэлэрин күүстэринэн сөргүтэн саҕалаары гыналлар. Кинилэр инникитин өрөспүүбүлүкэ өйөбүлүгэр эрэнэллэр.
Олохтоох көҕүлээһини өйүүр бырагырааманан Саха сиригэр сыллата 400-тэн тахса бырайыак олоххо киирэр. Бырагыраама кыттыгас үбүлэнэр. Улахан аҥарын өрөспүүбүлүкэ бүддьүөтэ уйунар, сорҕотун — олохтоох салайыныы бүддьүөтэ уонна спонсордар көмөлөрө. Маны таһынан урут олохтоох дьон судаарыстыбаннай үбүлээһин 3%-нын бэйэлэрэ уйуналлара. Быйылгыттан ити нуорма көтүрүллүбүт.
