«Сахабэчээт» автономнай тэрилтэ сүрүн дириэктэрэ Филипп Пестряков салалталаах айар бөлөх «Чолбон» 90 уонна «Полярная звезда» 60 үбүлүөйдээх сылларын бэлиэтээһини Таатта улууһуттан саҕалаата.
Саха сирин народнай суруйааччыта Тумат уонна Былатыан Ойуунускай аатынан судаарыстыбаннай бириэмийэ лауреата Урсун, суруйааччылар Уйбаан Ойуур, Айысхаана, Данил Макеев, Владислав Доллонов, Ираида Попова, Гаврил Андросов уонна «Саха сирэ» хаһыат суруналыыһа Ульяна Захарова таатталары кытта саха тылын, литературатын тула атах тэпсэн олорон кэпсэттилэр.
Ытык Күөлгэ «Таатта» улуус хаһыатын кэлэктиибин кытта көрүстүлэр, үс реалист суруйааччылар өйдөбүнньүк сирдэригэр уонна Алампа пааматынньыгар сибэкки дьөрбөтүн уурдулар.
Таатта айар бөлөхтөрүн түмсүүлэрэ «Чолбон» сурунаал «Сэмсэ» сыһыарыытын биир нүөмэригэр бэйэлэрин айымньыларын таһааттарар баҕалаахтарын биллэрдилэр.
Дьохсоҕоҥҥо олохтоохтору кытта аһаҕас, истиҥ кэпсэтии таҕыста. Баһылык Петр Захаров биир дойдулаахтарын сурунаалларга көхтөөхтүк суруталларыгар ыҥырда. Салгыы Чөркөөххө Былатыан Ойуунускай аатынан судаарыстыбаннай музей үлэһиттэрин кытта көрсүһүү буолла.
Таатта улууһун баһылыгын социальнай боппуруостарга солбуйааччыта Изабелла Сивцева: “Көрсүһүүлэр табылыннылар. Саха литературата, тыла сайдарын туһугар сөҕүмэр үлэни ыытан, дьоһун кылааты киллэрэ сылдьаргыт иһин махтанабын», — диэтэ.
