Үөһээ Бүлүү Кэнтик нэһилиэгэр “Чап уус” өрөспүүбүлүкэтээҕи тимир уустарын күрэҕэ буолан ааста. “Үөһээ-Бүлүү” муниципальнай оройуон, “Чап” уустарын ассоциацията, “Саха сирин уустара” түмсүү тэрийэн ыыттылар. Хаҥаластар ситиһиилээхтик кытыннылар.


2022 сыллаахха Үөһээ Бүлүүгэ ыытыллар олоҥхо ыһыаҕар бэлэмнэнии чэрчитинэн, тимир уустарын төрүт үгэстэрин, ньымаларын сөргүтэр, тимири уһаарар идэлэрин култуурунай сыаннас быһыытынан тилиннэрэр, саҥа хайысхалары көрдөөһүн быһыытынан ыытылынна.

«Чап ууһа» күрэхтэһиигэ Хаҥаластан Саха Өрөспүүбүлүкэтин норуотун маастара, Россия тимир сэбин-сэбиргэлин оҥорор маастардар гильдияларын чилиэнэ Александр Данилов салайааччылаах үс эдэр уус уол кытынна. Төрүт уус удьуордаах, улууспут биир киэн туттар тимир ууһуттан, уус күрэҕин  дьүүллүүр сүбэтигэр үлэлэспит Александртан күрэх хайдах ааспытын ыйыталастым.

— “Чап уус” күрэҕэр Саха сирин аҕыс  улууһуттан 67 тимир ууһа саха быһаҕын охсуутун икки көрүҥэр, тимир кыптыый уонна анньыы, этигэн хомус  күрэҕэр оскуола оҕолоро уонна уһанар улахан дьон күрэхтэстилэр. Хаҥалас улууһун хамаандатын састаабыгар  Малдьаҕар нэһилиэгиттэн уус уолаттар кытыннылар. Күрэххэ Тиит-Арыыттан Роман Аммосов, Улахан-Аантан Егоров Мукучу уонна Васильев Эрэл улууспут аатын чиэстээхтик көмүскээтилэр. “Дэгиттэр саха быһах” уонна “Булат ыстаалыттан оҥоһуллубут быһах”  көрүҥнэргэ улахан тургутуу буолла. Саха тимириттэн оҥоһуллубут, сытыы быһахтааҕынан Ньурбаттан Иван Васильев ааттанан, кыайыыны ситистэ. «Булат быһах» күрэҕэр «Кылаан ааты» Александр Терентьев ылла.

“Дэгиттэр саха быһах” көрүү-күрэххэ барыта 35 уус кытынна. Күрэх түмүгүнэн “Кылаан бириис” хаһаайынынан Хаҥаластан мин үөрэнээччим Роман Аммосов буолла. Бу биһиги, Хаҥалас уустара, улахан ситиһиибит. Кини Үөһээ Бүлүү улууһун инструмент маҕаһыыныттан 50 000 суумалаах сертификатынан наҕараадаланна.

Уус кэпсээбитинэн, кэнники уон сылга улууспутугар тимири уһаарыыга балачча хамсааһын  таҕыста. Өрөспүүбүлүкэҕэ ыытыллар Олоҥхо ыһыахтарыгар ситимин быспакка  ситиһиилэнэллэр Сайын аайы уол оҕоҕо аналлаах “Урайтус” уустар түһүлгэ-лааҕырдарын I уонна II Дьөппөн, Өктөм, Булгунньахтаах нэһилиэктэринэн үлэлэтэллэр.

«Түгэнинэн туһанан төрөөбүт улууһум дьонун-сэргэтин кытта биир улахан баҕа санаабын үллэстиэхпин баҕарабын. Ол курдук  аатырбыт былыргы уустар түөлбэлээн олорбут Хаҥалас сиригэр-уотугар улууспут өйөбүлүнэн 2023 сылга  аан дойду таһымнаах уустар күрэхтэрин тэрийиэҕиҥ диэн улууһум дьонун ыҥырабын”, — диэн аан дойдуга ыытыллар тимир уустарын күрэхтэрин кыайыылааҕа, тарбахха баттанар саха ууһа, аатырбыт Маачах Уус сиэнэ  Александр Данилов  санаатын үллэһиннэ.

Сигэн:

1
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.