«Чөл олох – олох нуормата» чөл олоҕу тутуһааччылар өрөспүүбүлүкэтээҕи V форумнара буолла. Сыл аайы ыытыллар форум Саха Өрөспүүбүлүкэтигэр арыгылааһыны утары охсуһуу бэлиитикэтин олоххо киллэриини салгыыр, нэһилиэнньэ арыгылаах утаҕынан үлүһүйүүтүн аҕыйатар, чөл олоҕу киэҥник тарҕатар соруктаах.
Форуму арыгылааһыны утары охсуһууга үлэни ыытар СӨ министиэристибэлэрэ, биэдэмистибэлэрэ, уопсастыбаннай хамсааһыннар уонна чөл олоҕу тарҕатааччылар көҕүлээн уонна тэрийэн ыыталлар.
Быйылгы форумҥа экономист, уопсастыбаннай деятель, геополитическай проблемалар академияларын чилиэнэ, «Ыччат чөл олохтоох киин куорат иһин» уопсастыбаннай тэрилтэ бэрэссэдээтэлэ, Москваҕа чөл олох иһин охсуһар сойуус бырабылыанньатын чилиэнэ Владимир Самарин ыалдьыттаата.
Форум кэмигэр киһи өйүн ииригирдэр эттиктэри туһаныыны бопсор, чөл олоҕу сырдатар социальнай бырайыактар уонна бырагыраамалар быыстапкаҕа туруорулуннулар.
Бырабыыталыстыба 2 №-дээх дьиэтигэр форум кыттааччыларыгар «төгүрүк остуол» ыытылынна. Манна Владимир Самарин чөл олоҕу батыһарга оҕолору уонна ыччаты кытары үлэ ньымаларын уонна технологияларын билиһиннэрдэ. Нам улууһун Партизан с. баһылыга Алексей Зырянов, Хатыҥ Үрэх баһылыга Алексей Пинигин, Бүлүү улууһун Тааһаҕар с. баһылыга Семен Каратаев уо.д.а. иһитиннэриилэрэ кыттааччылар болҕомтолорун тарта. Бу нэһилиэктэр чөл олох тирэх пуунун киллэриэхтэриттэн ыла нэһилиэнньэ өйө-санаа уларыйбытын, бары салааларга уопсай көрдөрүү тупсубутун астына кэпсээтилэр.
Форум пленарнай мунньаҕар сүрүн дакылааттары Матвей Лыткин, Карл Башарин, Людмила Григорьева, Зоя Башарина, Айсенэ Николаева, Петр Тумусов уо.д.а. атыттар оҥордулар.
Өрөспүүбүлүкэтээҕи форум кэмигэр «Оҕолор уонна ыччат киһи өйүн ииригирдэр эттиктэри туттууларын сэрэтии» куурус ыытылынна. «Чөл олохтоох Саха сирэ» уопсастыбаннай хамсааһын конференциятыгар элбэх киһи санаатын сайа этиннэ. Маны сэргэ «Ыччат чөл олох иһин» ыччат оскуолатын түмсүүтүгэр устудьуоннар, ыччат тэрилтэлэрэ тирээн турар кыһалҕалары дьүүллэстилэр.
