Дьокуускайдааҕы коммунальнай-тутуу техникумугар үөрэнэр ыччаттар сэргэх көрсүһүүттэн улаханнык астынан сылдьаллар. Бу туһунан СИА техникум педагог-организатора Иустинья Турнина кэпсээтэ.
Ыччаты кытта СӨ физкультура уонна спорт туйгуна, СӨ мас тардыһыыга спорт маастара, бу көрүҥҥэ РФ кылаабынай тренер, норуоттар икки ардыларынааҕы категориялаах судьуйа Николай Константинов уонна мас тардыһыыга СӨ, Россия чемпиона, Монголияҕа аһаҕас чемпионат кыайыылааҕа, Ереваҥҥа аан дойду иккис кубогар ыытыллыбыт күрэхтэһии кыайыылааҕа Павел Черноградскай көрсүбүттэр.
«Николай Элляевич үөрэппит, дьарыктаабыт спортсменын Павел Викторовиһы кытта кэлбитэ оҕолору ордук кэрэхсэттэ. Ыалдьыттар спордунан хаһааҥҥыттан уонна тоҕо дьарыктаммыттарын кэпсээтилэр. Туруоруммут сыалларын-соруктарын ситиһэллэригэр күүстээх санаалаах буолуу, чөл олоҕу тутуһуу, бэйэни чэбдигирдинии, барыга кыһамньы улахан тирэх буоларын бэлиэтээтилэр. Россия уонна тас дойду улахан түһүлгэлэригэр кыттыбыт видеороликтарын көрдөрдүлэр. Устудьуоннар элбэх ыйытыылары биэрдилэр. Чуолаан мас тардыһыытынан дьарыктаныыны аан маҥнай хайдах, туохтан саҕалыыры токкоолостулар. Элбэх сүбэни-аманы ыллылар», — диир Иустинья Максимовна.
Уолаттар бу курдук ирэ-хоро сэһэргэһииттэн киһи санаата саргыланарын, кэрэҕэ тардыһыы улаатарын бэлиэтээбиттэр. Итиэннэ сырдык ыра санаалаах, чэгиэн доруобуйалаах, чөл олоҕу тутуһар, үлэҕэ көхтөөх киһи барыга ситиһиилээх буолар диэн ис санааларын үллэстибиттэр.
Пожалуйста, подождите
Конец формы
