Өрөспүүбүлүкэтээҕи Быыбар киин хамыыһыйата Андрей Борисовы Госдума быыбарыгар кандидат быһыытынан регистрациялыырга аккаастааһын сокуоннай быраапка сөп түбэһэрин туһунан СИА-ҕа Быыбар киин хамыыһыйатын бэрэссэдээтэлин солбуйааччы Ирина Конакова эттэ.
Быыбар киин хамыыһыйатын атырдьах ыйын 14 күнүгэр буолбут мунньаҕын быһаарыытыгар элбэх алҕас баарынан, регистрацияны суут нөҥүө ситиһэр туһунан Андрей Борисов эппитэ.
«Чахчы, бэрээдэккэ сөп түбэспэт алҕастар бааллара. Биһиги ону быһаарбыппыт уонна Андрей Борисов бэрэстэбиитэлин кытта ырыппыппыт. Дьиҥэ суоҕунан ааҕыллыбыт 41 илии баттааһыны аахсыбыппыт. Мөккүөрдээх түгэннэргэ кини санаатын истибиппит. Ылыллыбыт бүтэһиктээх быһаарыы сокуон быраабыгар сөптөөх», — диир Ирина Конакова.
Атырдьах ыйын 14 күнүгэр быыбардааччылар илии баттааһыннарын 5 уонна онтон элбэх бырыһыана дьиҥэ суоҕа биллибитинэн, Андрей Борисовы Госдума быыбарыгар кандидат быһыытынан регистарциялыырга Быыбар киин хамыыһыйата аккаастаабыта.
