Үлэ көрдөнө сылдьар дьоҥҥо анаан, бэҕэһээ Дьокуускай куорат нэһилиэнньэтэ дьарыктаах буолуутун киинэ уонна М.К.Аммосов аатынан ХИФУ “Куруһаала” эргиэн киинигэр дьаарбаҥка тэрийдилэр.
Бу күн барыта 56 тэрилтэ кэлэн 1600-тан тахса үлэ миэстэтин үлэ көрдөнөөччүлэргэ билиһиннэрдэ. Маны таһынан, дьарыктаах буолуу киинигэр 3200-тэн тахса үлэ миэстэтэ баар эбит. Билиҥҥи туругунан, Дьокуускай куоракка 1600-тэн тахса киһи үлэ көрдөнөр. Олортон 1000-тан тахсата үлэлээбэккэ олорор. Бу сыыппараны сыл саҕаланыытыгар холоон көрдөххө, 0.1% үрдээбит.
Дьаарбаҥка сүрүн уратытынан, Алданнааҕы “Золото Селигдар” уонна Нерюнгритааҕы “Колмар” тэрилтэлэр онлайн көмөтүнэн тургутук кэпсэтиини тэрийиилэрэ буолла. Манна эрдэ сайаапка биэрбит тоҕус киһи кытынна. Өскөтүн, кинилэр тэрилтэлэр эппит бары усулуобуйаларыгар сөбүлэстэхтэринэ, быһаччы үлэҕэ киирэр кыахтаахтар.
Дьаарбаҥка СӨ бырабыыталыстыбатын соругунан тэриллибит “Олохтоох каадыры — бырамыысыланнаска” бырайыакка олоҕуран ааста. Манна даҕатан эттэххэ, бүгүн Нэһилиэнньэ дьарыктаах буолуутун киинэ Нерюнгри куоракка, сарсын Алдан куоракка бырамыысыланнас тэрилтэлэрин кытары бииргэ үлэлэһэр туһунан дуогабар түһэрсэ бардылар. Бу иннинэ хас даҕаны бырамыысыланнас тэрилтэлэрэ быйыл араас оройуоннартан үлэтэ суох сылдьар, кырата 600 киһини үлэҕэ ылалларын туһунан судаарыстыбаннай кэмитиэти кытары дуогабардаспыттара.
Тэрээһин кэмигэр араас маастар-кылаастары ыыттылар, бэйэ дьыалатын арыныан баҕалаахтарга сүбэ-ама биэрдилэр. Анал үөрэхтээһин хайысхата кытары баара. Онно хара үлэ бары көрүҥэр разряд, араас тиэхиньикэни ыытар быраап ыларга үөрэх миэстэлэрэ баалларын билиһиннэрдилэр. Түмүккэ кыттыыны ылбыт дьоҥҥо барыларыгар сертификат туттардылар.
