Балаҕан ыйын 1 күнүгэр ‒ Билии күнүн көрсө Холгума нэһилиэгэр саҥа оскуола-саад дьиэтин үөрүүлээх аһыллыыта тэрилиннэ. Нэһилиэк олохтоохторо өр сылларга күүппүт-кэтэспит баҕа санаалара туолан, кэнчээри ыччакка анаан тутуллубут үөрэх-иитии кыһата «Айар кут арыллар кыһата» диэн ыҥыра-угуйа турар суруктаммыт.


Оскуола-саад киһи санаатын үөрдэр сырдык өҥнөрүнэн тулаламмыт, үөрэнээччилэр, оҕо саадын кырачаан иитиллээччилэрэ үөрэнэллэригэр-сайдалларыгар сөптөөх усулуобуйа, толору хааччыллыылаах гына тэриллибит. Кылаастар биридимиэттэринэн «Төрүт тыл түһүлгэтэ», «Сайа этии эйгэтэ», «Кэрэ эйгэтэ», «Сонуну арыйыы эйгэтэ», «Уран тыл эйгэтэ», «Холонуу туоната», «Арыллар саҕах эйгэтэ», «Бодоруһуу туоната», «Толкуй хонуута» диэн сахалыы кэрэхсэбиллээхтик суруллубуттар. Холгума нэһилиэгиттэн үүнэн-сайдан тахсыбыт биир дойдулаахтара философскай наука хандьыдаата, профессор Еремей Попов, саха норуодунай артыыһа Марина Попова, РФ үтүөлээх учуутала Егор Федоров ааттара-суоллара суруллубут.

Саҥа таас дьиэҕэ киирии алгыс тылларын олохтоохтортон өрөспүүбүлүкэ Дархан этээччитэ Герман Яковлев этэн аал уоту күндүлээтэ. Аалай лиэнтэни үөрүүлээх быһыыга-майгыга СӨ Үөрэҕириигэ уонна Наукаҕа министиэристибэтиттэн Ольга Захарова, оройуон баһылыга Николай Старостин, улуустааҕы үөрэх управлениетын начаалынньыга Ирина Черкашина, тутуу тэрилтэтин салайааччыта Иван Никифоров, улуустааҕы тутуу управлениетын начаалынньыга Александр Куличкин, Холгума нэһилиэгин баһылыга Гаврил Ефимов быстылар.

Оройуон баһылыга Николай Старостин нэһилиэк дьонугар-сэргэтигэр икки бүк улахан бырааһынньыгынан эҕэрдэлээтэ. «Биллэрин курдук, «Үтүө дьыала» хамсааһын биһиги улууспутуттан саҕаламмыта. Алексей Дмитриевичсалайааччылаах «Мин Сахам сирэ ‒ XXI үйэҕэ» тэрилтэ өрөспүүбүлүкэҕэ үгүс тутууну үлэҕэ киллэрэр. Аатыгар да баарын курдук, нэһилиэнньэ, олохтоох дьаһалта, оройуон салалтата кыттыһан биир сомоҕо буолан норуот тутуутунан ааттанар. Өрөспүүбүлүкэҕэ сыбаайалардаах, монолитнай-каркаастаах биир бастакы таас тутуунан сыаналанар, онон уһун үйэлээх, хаачыстыбалаах буолара мэктиэлэнэр», ‒ диэтэ.

Нэһилиэк баһылыга Гаврил Ефимов хас да көлүөнэ олохтоохтор ыра санаа оҥостубут оскуолалара аһыллар үөрүүлээх түгэнигэр түмсүбүттэринэн эҕэрдэлээтэ. Оройуон дьаһалтатыгар, үөрэҕирии салалтатыгар, уһун кэмҥэ туруорсууга күүс-көмө буолбут урукку баһылыкка Николай Поповка, тутааччыларга махтанна итиэннэ уһун сылларга тутуута ситиһиллибэтэх дьиэ «Мин Сахам сирэ ‒ XXI үйэҕэ» хамсааһын үбүлээһининэн олоххо киллэриллибитэ туһугар хорсун быһыы буоларын бэлиэтээтэ.

Икки этээстээх саҥа таас дьиэни кылгас кэм иһигэр ИванПетр Никифоровтар салайааччылаах «Арктика-тутуу» тэрилтэ туппут. Тутуу тэрилтэ аатыттан Иван Никифоров саҥа тутууну этиллибит болдьоххо туттарбыттарын, оскуола боруогун саҥа атыллыыр кырачааннарга үөрүүлээх түгэн олохторун биир умнуллубат түгэнэ буоларыгар баҕа санаатын эттэ уонна символическай күлүүһэ оскуола дириэктэригэр Василий Денисовка туттарда.

Бу күн оройуон уонна нэһилиэк салалталарын аатыттан маҥнайгы кылааска киирбит Кристина Игнатьеваҕа, Эрчим Устиновка, Миша Поповка, Мичил Поповка, Сайнаара Чупроваҕа, Сандаара Яковлеваҕа сэмэй бэлэхтэр туттарылыннылар. Кинилэргэ маҥнайгы учууталларынан Наина Ларионова ананна.

Бэлиэ түгэҥҥэ үөрэнээччилэр, төрөппүттэр оскуола тутуутугар үлэлэспиттэргэ махтал тылларын тиэртилэр. Эҕэрдэ ырыаларынан, үҥкүүлэринэн, маҥнайгы кылаас үөрэнээччилэрин хоһооннорунан үөрүүлээх тэрээһин түмүктэннэ.

Бырама ситэтэ суох орто үөрэхтээһин оскуола-саадыгар 69 оҕолоох, кинилэртэн 25-тэрэ оҕо саадын иитиллээччилэрэ. Тэрилтэҕэ 21 иитэр-үөрэтэр үлэһиттээх. Быйыл оскуолаҕа дириэктэри иитэр-үөрэтэр үлэҕэ солбуйааччынан, английскай тыл учууталынан уонна оҕо саадыгар иитээччинэн саҥа үлэһиттэр кэлбиттэр.

АаптарМарфа ПТИЦЫНА.

0
0
comments powered by HyperComments