Быраастары ытыалаабыт киһиэхэ дьыала тэрилиннэ

0
39

Бу быһылаан соторутааҕыта, тохсунньу 21 күнүгэр, Алдан куоракка күрүлүүр күнүс буолбута. Сиһилии edersaas.ru ааҕыҥ. 


Ритуальнай өҥөлөрү толорор эйгэҕэ үлэлиир 49 саастаах предприниматель чааһынай дьиэтигэр ойоҕунаан уонна сокуоннай сааһын ситэ илик уол оҕотунаан олорон, ити күн, 13.00-14.00 чаастар саҕана, хайдах эрэ буолан турбут — «САЙГА-410 К» карабин саатын сотору-сотору ыла-ыла, кырыгырар-кыбдьырынар буолбут. Дьоно аах куттанан, дьиэлэриттэн тахсан баран, «Суһал көмөнү» уонна полицияны ыҥырбыттар.

Биэс полицейскай, биэлсэр, «Суһал көмө» суоппара быһылаан сиригэр кэлбиттэригэр, хаһаайын түннүгүн арыйан, массыына диэки карабинынан тирээбит. Бастаан салгыҥҥа биирдэ, онтон «Суһал көмө» массыынатын туһаайан, үстэ ыппыт.

Ол кэнниттэн аны атын түннүккэ кэлбитигэр, полицейскай кинини саатын быраҕарыгар этэн баран, сэрэтэн, үөһэ биирдэ ыппыт. Онуоха эр киһи кыһаммакка, утары мордьойбутугар, полицейскай кинини санныга уонна искэ ыппыт.

Бу чахчынан РФ Холуобунай кодексатын 318-с ыст. 1 чааһынан, ол эбэтэр, былаас бэрэстэбиитэлэ дуоһунаһын боломуочуйатын толороругар күүһү туттуунан суоһурҕаныы бэлиэтэ баарынан холуобунай дьыала тэрилиннэ.

Уорбаланааччы билигин балыыһаҕа сытар, киниэхэ эпэрээссийэ оҥорбуттар, туруга ыарахан.

Бу быһылааҥҥа, дьолго, ким да уонна эмсэҕэлээбэтэх.

Силиэдэбэтэллэр уорбаланааччы дьайыытыгар Холуобунай кодексынан көрүллэр өссө икки буруй састааба — өлөрөргө суудайыы уонна күлүгээннээһин — баарын-суоҕун быһаарыахтара.

Бу туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.

0
0

Хоруй суох

Хоруйдаа