«Элбэх дьоҥҥо олорор дьиэ боппуруоһа сытыытык турар. Бу кыһалҕаны быһаарар туһугар араас өрүттээх үлэни толкуйдуубут, ыытабыт, ол иһигэр баараҕай бырагыраамалары туһанабыт. Итинник бырагыраама чэрчитинэн олорор дьиэҕэ маннык сертификаттары биэрэбит. Быйыл 12 млрд тахса суумалаах 6,5 тыһ. сертификаты наадыйааччыларга түҥэтиэхпит», — диэн олунньу 8 күнүгэр РФ Бырабыыталыстыбатын бэрэссэдэтэлэ Дмитрий Медведев этэн турар.
Премьер бэлиэтээбитинэн, үлэлэриттэн тохтуур байыаннай сулууспалаахтарга, ис дьыала уорганнарын үлэһиттэригэр, араас саахалартан эмсэҕэлээбиттэргэ, Уһук Хоту сиртэн көһөн барааччыларга, уо.д.а. категорияларга киирсэр дьоҥҥо олорор дьиэ сертификаттарын биэриэхтэрэ.
Олунньу 5 күнүгэр тахсыбыт уураахха олоҕуран Саха сиригэр Уһук Хоту сиртэн көһөөччүлэргэ 146 олорор дьиэ государственнай докумуона анаммыт. Ити уопсай суумата 265,8 мөл. солк. тэҥ.
СӨ Үлэҕэ, социальнай сайдыыга министиэристибэтигэр СИА-ҕа эппитинэн, 2015 сыл тохсунньу 1 күнүнээҕи туругунан өрөспүүбүлүкэтээҕи уочаракка барыта 11 595 дьиэ кэргэн турар. Кинилэр ортолоругар 1 342 инбэлииттээх дьиэ кэргэн, 7 717 пенсия ылар саастарыгар тиийбит дьиэ кэргэн, 40 үлэтэ суох, 3 496 үлэлиир дьон бааллар.
2015 сыллаахха 130 дьиэ кэргэн, ол иһигэр 87 инбэлиит, 43 пенсионер олорор дьиэ государственнай сертификатын ылбытта
