Быйыл Арассыыйа үрдүнэн Билии күнүн көрсө 67 оскуола аһыллара биллэр. Сыл бүтүөр диэри 119 оскуола үлэҕэ киириэҕэ. Онон уопсайа, 100 тыһ. кэриҥэ саҥа үөрэх миэстэтэ тэриллиэҕэ. Оттон Саха сиригэр хайдаҕый?


Бүгүҥҥү күҥҥэ үөрэх тэрилтэлэрэ бары бэлэмнэр. 2018-2019 үөрэх дьылыгар барыта 43 саҥа эбийиэк үлэҕэ киирэрэ биллэр. Итинтэн 12-тэ оскуола (2625 миэстэ), 31-рэ уһуйаан (3473 миэстэ). Оттон Билии күнүн көрсө, Покровскай куоракка 350 миэстэлээх 3-с нүөмэрдээх оскуола уонна Мэҥэ Хаҥалас улууһун Бырама сэлиэнньэтигэр 50/18 миэстэлээх оскуола-оҕо саада үөрэнээччилэри, кырачааннары үөрэ көрсүөҕэ.

Өрөспүүбүлүкэ үрдүнэн, уопсайа, 652 оскуола баар. Итинтэн 45 % эрэ толору хааччыллыылаах. Күн бүгүн үлэлии турар оскуола баһыйар үгүс ахсаана, ол эбэтэр 72 % тыа сиригэр баар. Ил Дархан эбээһинэһин быстах кэмҥэ толорооччу Айсен Николаев үөрэх үлэһиттэрин кытта көрсүһүүтүн кэмигэр 59 оскуола саахалланар туруктаах диэн иһитиннэрбитэ. Ити ааспыт сылга тэҥнээтэххэ, 8 бырыһыанынан аҕыйах. Сыл устата өссө икки саахалланар туруктаах оскуола боппуруоһун быһаарыахтаахтар.

Ааспыт үөрэх дьылыгар 143,6 тыһ. оҕо оскуолаҕа үөрэнэрэ. Оттон быйыл оскуола боруогун 15,8 тыһ. оҕо атыллыаҕа.

Людмила ПОПОВА, “Саха сирэ” хаһыат, edersaas.ru

Мария ВАСИЛЬЕВА (СИА) хаартыскаҕа түһэриитэ.

0
0
comments powered by HyperComments