Саха сириттэн орто үөрэхтээһин преподавателэ Михаил Ваганов тохсунньуттан хамнаһа 60 тыһыынчаҕа тиийэ үрдээбитин, ол эрээри итини үс эрэ ый ылбытын туһунан иһитиннэрэн туран, хамнаһы үрдэтии тоҕо быстах кэмҥэ ыытылларын ыйытта. Онуоха РФ бэрэсидьиэнэ маннык хоруйдаата.
“Бу олус суолталаах боппуруос. Оскуолаҕа, орто, үрдүк үөрэхтэргэ хамнаһы үрдэтии барыахтаах уонна салгыы үрдээн иһиэхтээх этэ. Бу туһунан эрэгийиэн салайааччыларын кытары кэпсэтэн турабын. Эрэгийиэн орто хамнаһыттан көрөн үрдэтии барыахтааҕа”, — диэн этэр.
“Түгэнинэн туһанан, эрэгийиэннэр салайааччыларыгар туһаайан этиэм этэ, Судаарыстыбаннай Сэбиэккэ сотору кэминэн бу боппуруоһу көрүөхпүт. Туһааннаах министиэристибэлэри кытары маны ырытыахпыт”, — диэн иһитиннэрдэ.
Видеосибээһинэн Ил Дархан эбээһинэһин быстах кэмҥэ толорор Айсен Николаев: “Хамнаһы үрдэтии биһиги эрэгийиэммитигэр бара турар. Хамнаһы кыччатыы барыа суохтаах этэ. Маны быһаарсыахпыт”, — диэн эттэ.
Санатан эттэххэ, Владимир Путин 2012 сыллаахха таһаарбыт «ыам ыйын ыйаахтарынан» Саха сиригэр бүддьүөт үлэһиттэрин хамнастарын үрдэтии түһүмэҕинэн ыытыллыбыта. Былырыын күһүн алтынньыга үрдээн баран, быйыл тохсунньуттан эмиэ үрдээбитэ.
Аграфена КУЗЬМИНА, “Саха сирэ” хаһыат, edersaas.ru.
