Бэҕэһээ Таатта улууһун Чычымаҕар буулдьанан ытыыга улуустааҕы аһаҕас турнир буолла. Бу туһунан СИА Амма нэһилиэгин Эллэй аатынан орто оскуола учуутала, күрэхтэһии кылаабынай судьуйата Артур Иванов билиһиннэрдэ.
Артур Николаевич кэпсээбитинэн, Амма нэһилиэгин бэтэрээннэрин бириистэригэр анаммыт күрэстэһиигэ улуус биэс нэһилиэгиттэн 50 спортсмен кыттыбыт. Дуорааннаах күрэхтэһиини нэһилиэк дьаһалтата уонна орто оскуола коллектива тэрийбиттэр.
«Күрэхтэһии былырыын эмиэ ыытыллыбыта. Онон спортсменнар нэмнэрин билсибит дьон быһыытынан, быйылгы күөн көрсүһүүгэ бары ох курдук оҥостон кэлбиттэр. Күрэстэһиини саастарынан араартаатыбыт. Онон киирсии ордук сытыырхайда», — диэн этэр.
Уопсай түмүккэ муҥутуур кыайыылаахтар быһаарыллыбыттар. 235 очколаах Дмитрий Сунхалыров (Кыйы) 1 миэстэни ылан дойдулаахтарын үөрдүбүт. Иккис миэстэни улахан дьонтон хаалсыбакка тилэх үктэһэн, 233 очколанан, Дьохсоҕон орто оскуолатын үөрэнээччитэ Андрей Заворотнай ылан, көрөөччүлэри улаханнык сөхтөрбүт. Үһүс бириистээх миэстэҕэ Чымнаайы спортсмена Семен Хоютанов тиксибит (232 очколаах).
Дьахталларга муҥутуур кыайыылааҕынан Чымнаайыттан кыттыбыт Марфа Васильева (201 очко) буолбут. Кини кэнниттэн бэрт кыранан хаалан Дьохсоҕон хамаандатын чилиэнэ Любовь Тарбахова (196 очко) иккиһи, Чымнаайы олохтооҕо Иванна Мочегусова (182 очко) үсүһү ылбыттар.
Эр дьоҥҥо кыраҕы харахтаахтар эрбии тииһин курдук эриспиттэрин түмүгэр кыйылар күннээбиттэр. 1 м. — Савва Бучугасов, 2 м. – Дмитрий Сунхалыров ылбыттар. Үһүскэ Чымнаайыттан кыттыбыт Роман Мочегусов тиксибит.
9-10 кылаас оҕолоругар кыайыылааҕынан Чычымах орто оскуолатын үөрэнээччитэ Коля Гуляев тахсыбыт. Иккис – Андрей Заворотнай (Дьохсоҕон), үһүс – Юра Васильев (Харбалаах) буолбуттар.
Ыччаттарга Алексей Егоров (Чычымах), Петр Полускин (Кыйы), Семен Хоютанов (Чымнаайы) үс бастакы миэстэлэри ылаттаабыттар. Кыргыттарга Чычымах кыраҕы харахтааҕа Надя Егорова бастаабыт.
2001 сыллаахтан бэтэрээ төрүөх оҕолорго киирсии эмиэ сэргэхтик барбыт. Чемпион Валентин Постников (Кыйы о.о.), 2 миэстэ – Айысхаан Осипов (Чычымах), 3 – Семен Пестряков (Кыйы) буолбуттар. Кыргыттарга Алена Налыяхова (Чычымах) кыайыылаах аатын сүкпүт.
1999-2000 с.т. кыргыттарга үс бастакы миэстэни Бучугасова (Кыйы), Иванна Мочегусова (Чымнаайы), Алина Терякова (Харбалаах) үллэстибиттэр.
Ветеран дьахталларга Раиса Аржакова (Чычымах), ветеран эр дьоҥҥо — Данил Афанасьев (Чычымах), орто саастаахтарга Артур Иванов (Чычымах) кыайыылаахтарынан тахсыбыттар.
Муҥутуур кыайыылаахтар ортолоругар чемпионнаабыттарга сэрии ветерана, суруйааччы, олоҥхоһут Михаил Герасимович Соров аатыттан аймахтара дохсун ытыс тыаһыгар доҕуһуоллатан сертификат туттарбыттар. Кыттыбыт бары спортсменнарга Амма нэһилиэгин ветераннара бириистэри бэлэхтээбиттэр, мэтээллэри кэтэрдибиттэр. Күрэхтэһии көхтөөхтүк барбытыттан бары сылдьыбыт дьон олус астынан, үөрэн тарҕаспыттар.
