Тиксии бөһүөлэгэр быыбардыыр учаастакка сарсыардаттан дьон тоҕуоруһа мустан, дьоһуннаах диэбит кандидаттарыгар куоластарын биэрэллэр. Кэлээччи ахсаана эбиллэ турар.
Булуҥ улууһугар быйыл быыбарга эппиэтинэстээх сыл. Ол курдук Госдуманы сэргэ оройуон уонна бөһүөлэк баһылыктарын дуоһунастарыгар кандидаты талыыга эмиэ праймериз буола турар. Кинилэртэн бүгүҥҥү барыллаан куоластааһын түмүгүнэн аны күһүн буолар быыбардарга кандидаттар талыллыахтара.
«Барыллаан куоластааһын ыыппыттарын олус биһирээтим. Ити аата норуот эрэнэр, итэҕэйэр киһитин таларыгар кыах биэрдилэр. Олус көхтөөхтүк бара турар. Саамай бастыҥнара диэбит киһибэр куоласпын биэрдим», — диэн кэпсиир Сииктээх олохтооҕо Галина Смирнова.
Тиксии-1 уонна Тиксии-3 кииннэнэн икки учаастак үлэлиир. Күнүс 15:00 чаастааҕы туругунан, манна 661 киһи куоластаата.
Улууска саамай көхтөөхтүк кыттан иһэр быыбардыыр уокуругунан Тиксии-1, Күһүүр, онтон Түмэти буолаллар.
Улуустааҕы “Арктика Майааҕа” хаһыат кылаабынай редактора Анатолий Иванов Госдумаҕа кандитакка киирсэр кыттыылаахтартан республика сайдыытыгар эппиттэрин толорор, туруорсар СР бырабыыталыстыбатын бэрэссэдээтэлэ Галина Данчиковаҕа, СР Ил Дарханын уонна бырабыыталыстыбатын дьаһалтатын салайааччы Юрий Куприяновка уонна “Саха Сирэ” хаһыат кылаабынай редакторыгар Чокуур Гаврильевка куолаһын биэрбитин этэр.
