Сайтпытыгар бэҕэһээ, ыам ыйын 24 күнүгэр, Хаҥалас улууһун Булгунньахтаах сэлиэнньэтигэр буолбут алдьархай туһунан «Булгунньахтаахха хас да киһини, ол иһигэр, оҕону өлөрдүлэр» диэн иһитиннэриигэ суруйбуппут. Бүгүн бу быһылааҥҥа сыһыаннааҕы ЯСИА (https://ysia.ru/) сонуннарыгар уонна быраабы араҥаччылыыр уорганнар иһитиннэриилэригэр олоҕуран тиэрдэбит.
Тыа сиригэр маннык, киһи өйүгэр батан киирбэт иэдээн тахсыбытын туһунан аан бастакынан ЯСИА иһитиннэрбитэ. Ону ааһан, бу портал суруналыыстара Дьулустаан Сергеев уонна Айаал Яковлев быһылаан сиригэр — Булгунньахтаахха — тиийбиттэрэ.
Суруналыыстар билбиттэринэн
Ити идэмэрдээх иэдээни оҥорбут киһинэн 1952 с. төрүөх Александр Н. диэн киһи буолар эбит. Олохтоохтор кэпсииллэринэн, бу киһийдэх Дьокуускай куораттан уонча сыллааҕыта көһөн кэлбит — дьиэ атыылаһан, соҕотоҕун олорбут. Кими да кытта билсиспэккэ-кэпсэппэккэ, бэйэтэ бэйэтигэр бүөм олорбут. Бэл диэтэр, түннүктэрин тимир эрэһээҥкинэн бүөлээбит.
Өлөрүөхсүт бастакы сиэртибэлэринэн аҕалаах уол Павловтар буолбуттар. Онтон саа тыаһын истэн тахсыбыт Артамонову өлөрбүт. Бу киһи киин куораттан эпэрээссийэ оҥорторон дьиэтигэр кэлбитэ биир эрэ чаас буолаахтаабыт…
Салгыы атын ыалларыгар — Тимофеевтарга — тахсан, дьахтары уонна кини 11 саастаах уолун ытан өлөртөөбүт. 14 саастаах кыыстара орон анныгар саһан быыһанаахтаабыт…
Өлбүт дьахтар ийэлээх аҕата ити кэмҥэ оҕуруоттарыгар түбүгүрэ сылдьыбыттар.
Өлөрүөхсүт сиэртибэлэринэн буолбуттар: Павел Павлов 1952 с.т., Павел Павлов 1980 с.т., Алексей Артамонов 1958 с.т., Анна Тимофеева 1984 с.т., Максим Кудрин 2007 с.т…
Быһылаан буолаатын, нэһилиэк баһылыга уонна землеустроитель онно барбыттар. Полиция Покровскай куораттан айаннаан кэлиэр диэри, ол эбэтэр, чаас устата олохтоохтор бэйэлэрэ ким да киирбэтин-ааспатын курдук быһылаан сирин сыаптаабыттар.
Ииримтийбит туруктаах өлөрүөхсүт куота-саһа сатаабатах. Төттөрүтүн, уулуссаҕа сыгынньах аҥардаах сылдьан, барыларын ытыалыах буолан хаһыытаабыт-орулаабыт. Ол кэнниттэн дьиэтигэр киирэн хатаммыт.
Тиийэн кэлбит полицейскайдар кинини дьиэтиттэн араас ньыманан таһаара сатаабыттар. Түннүктэрин тааһынан тамнаан, онно хардаран ытыалаан буулдьатын бараан бүтэриэҕэр эрэммиттэр.
Онтон участковай боломуочунай дьиэҕэ киирэргэ холоммута — киһилэрэ номнуо бэйэтин ытыммыт эбит.
РФ Силиэстийэлиир кэмитиэтин Саха сиринээҕи управлениета:
— 2018 сыл ыам ыйын 24 күнүгэр, күнүс 14.20 мүн. саҕана силиэстийэ уорганнарыгар иһитиннэрии киирбит. Хаҥалас улууһун Булгунньахтаах сэлиэнньэтигэр Лесной уулуссаҕа турар үс дьиэҕэ түөрт эр киһи, биир дьахтар уонна биир 11 саастаах оҕо өлүктэрэ көстүбүтүн туһунан.
Барыллаан быһаарыынан, 65 саастаах киһи «Вепрь» карабинынан сэбилэнэн, ыалларыгар тахсан, абааһы көрөр санааттан дьахтары, оҕону, эр киһини ытан өлөртөөбүт. Онтон дьиэттэн тахсан, өссө икки киһини ытан өлөрбүт. Ол кэнниттэн дьиэтигэр кэлэн, бэйэтин ытыммыт.
Быһылаан буолбут сиригэр РФ Силиэстийэлиир кэмитиэтин Саха сиринээҕи управлениетын салайааччыта, управление аппараатын үлэһиттэрэ уонна полицейскайдар тиийдилэр.
Өлбүттээхтэр кимнээхтэрэ быһаарылынна.
Бу чахчынан «Иккиттэн элбэх киһини соруйан өлөрүү» ыстатыйанан холуобунай дьыала тэриллэн силиэйстийэлэнэр.
СӨ Борокуратуурата:
— Бу чахчынан өрөспүүбүлүкэ борокуратуурата бэрэбиэркэ саҕалаата. Буруйу оҥорууну сэрэтии туһунан сокуону тутуһуу хайдаҕын быһаараары.
Бэрэбиэркэ кэмигэр өйдөтөр-сэрэтэр систиэмэ дуоһунастаах үлэһиттэригэр, ол иһигэр, быраабы араҥаччылыыр уорганнар үлэлэригэр сыанабыл бэриллиэҕэ.
Холуобунай дьыаланы силиэстийэлээһин борокуратуура хонтуруолугар сылдьар.
Быһылаан буолбут сиригэр Хаҥалас улууһун борокуруора тиийдэ.
Бу алдьархай тахсыбытынан Ил Дархан Егор Борисов өлбүттээхтэр чугас дьонноругар дириҥ кутурҕанын биллэрбитэ, өрөспүүбүлүкэ бырабыыталыстыбата өлбүттээхтэр аймахтарыгар көмөлөһүөҕэ диэн иһитиннэрбитэ.
Хаҥалас улууһугар үс күннээх траур биллэрилиннэ…
Вера Макарова, «Саха сирэ» хаһыат, edersaas.ru
Хаартыска уонна видео: РФ СК Саха сиринээҕи управлениета уонна ЯСИА.
