Борис Сдвижков – сахалыы многоборьеҕа күрэс кыайыылааҕа

Ааспыт субуоталаах өрөбүлгэ “Модун» спорт киинигэр уолаттар ортолоругар сахалыы многоборьеҕа турнир буолла. Бу саҥа тэриллибит национальнай многоборьеҕа өрөспүүбүлүкэтээҕи федерация былааҕынан ыытыллыбыт бастакы күрэхтэһиигэ уон биир улуустан итиэннэ “Батас”, “Боотур” кулууптартан сүүрбэ үс уолан кытынна.

Манна 21-гэр саастаах эдэр боотурдар “үс төгүл үскэ”, “тутум эргииргэ”, хапсаҕайга, 400 м сырсыыга, мас тардыһыытыгар күрэс былдьаһан, үөлээннээхтэрин илиилэрин билистилэр, күүстэрин тургутуннулар, кыһыҥҥы эрчиллиилэрин түмүгүн көрүннүлэр.

“Үс төгүл үскэ” Кэбээйи уолана Дмитрий Ильинов 31,65 м түһэн бастаата. “Тутум эргииргэ” Борис Сдвижков (ХИФУ-Амма) 55-тэ эргийэн кыайыылааҕынан таҕыста. Бу көрдөрүүнү хатылаабыт Станислав Андросов (“Боотур”-Чурапчы) иккис буолла. Хапсаҕайга Альберт Нестеров (ХИФУ-Мэҥэ Хаҥалас) түмүк хапсыһыыга Айдын Гаврильевы бүдүрүтэн, аҥардастыы аатырда. 400 м сырсыыга Айдын Гаврильев(“Боотур”-Уус Алдан) иннигэр кими да түһэрбэтэ, биэтэккэ бастакынан дайан кэллэ (53,95 сөкүүндэ). Мас тардыһыытыгар Альберт Слепцовка (“Боотур”-Абый) тэҥнэһиэх мадьыны баара көстүбэтэ.

Биэс көрүҥ түмүгүнэн университет физкультурнай институтун төрдүс курсун устудьуона Борис Сдвижков 15 очукуоланан эрэллээхтик бастаата. Кини “үс төгүл үскэ” 30,76 миэтэрэни түһэн төрдүс,”тутум эрииргэ” 55-тэ эргийэн бастакы, хапсаҕайга — үһүс, мас тардыһыытыгар төрдүс буолла итиэннэ сүүрүүгэ үһүс көрдөрүүлэннэ.

“Боотур” кулууп иитиллээччилэрэ Николай Гаврильев (Хаҥалас), Эрэл Сивцев (Уус Алдан) туһааннааҕынан 29 уонна 34 очуокуону ылан, пьедестал иккис, үһүс үктэллэригэр таҕыстылар. Төрдүс миэстэни ылбыт эмиэ “Боотур” кулуупка эрчиллэр Уус Алдан ыччата Айдын Гаврильев 37 очукуолаах төрдүс буолла. Кини “тутум эргииргэ” дубук туттан, 21очукуону “ындыыламматаҕа” буоллар, тааҕы таах үс иһигэр киириэ хаалла…

Бу уолаттары өйдөөн хаалыаҕыҥ, аны аҕыйах сылынан “Дыгын оонньууларын” түһүлгэтигэр кинилэр ааттара дорҕоонноохтук ааттаныа турдаҕа.

Уоланнар күрэхтэһии үөрүүлээх аһыллыытыгар саха биллиилээх боотурдарыттан Иннокентий Макаровтан, Николай Дьяконовтан, Иван Белолюбскайтан алгыс ылан сүрдээҕин диэн астынныларБастыҥтан бастыҥнара муус устар 29-30 күннэригэр “Дохсуҥҥа” ыытыллар “Дыгын оонньууларыгар” сүүмэрдиир бастакы түһүмэххэ күүстэрин холоһор баҕалаахтарын эттилэр.

Борис Сдвижков, ХИФУ физкультурнай институтун төрдүс курсун устудьуона:

—Мин мас тардыһыынан бэһис сылбын дьарыктанабын. Спорка бастакы хардыыларбын Аммаҕа Афанасий Владимиров салалтатынан оҥорбутум. Билигин университекка Александр Захаровка, Егор Кудриҥҥа уонна Михаил Борохиҥҥа эрчиллэбин. Тириэньэрдэрбэр махталым улахан.

Бүгүҥҥү кыайыыбын төрөппүттэрбэр – ийэлээх аҕабар аныыбын.

Роман Попов, edersaas.ru

This post was published on 17.04.2018 19:19 19:19