Амма Болугурун оскуолатын хамаандата учууталлар методическай турнирдарыгар улууска кыайыылааҕынан таҕыста. Онон салгыы оройуон чиэһин өрөспүүбүлүкэҕэ көмүскүөҕэ.
Болугур орто оскуолатын учууталларын хамаандата улуустааҕы методическай турнирга түөрт киһилээх 10 хамаанда кыттыбытыттан кыайыылааҕынан таҕыста уонна кулун тутар 9-12 күннэригэр ыытыллыахтаах VI өрөспүүбүлүкэтээҕи түһүмэххэ кыттар быраабы ылла. Иккис миэстэ Амма 2 №-дээх орто оскуолатын «Вектор», үһүс миэстэ лицей «Синергия» хамаандалара буоллулар.
«Педагогикаҕа бастакы холонуу» анал ааты Соморсун «Дьоҕур», «Тэйиччиттэн үөрэх бастыҥнара» анал ааты Сулҕаччы «Знатоки», «Маастарыстыба уонна айар үлэ» анал ааты Амма 1 №-дээх орто оскуолатын «МодульХ» хамаандалара ыллылар. Бу күрэхтэһии үөрэх эйгэтигэр аныгы көдьүүстээх ньымалары, бастыҥ үлэ уопутун, интэриэһинэй уруоктары, сонун бырайыактары таһаарар сыаллаах ыытыллар. Хамаандалар үлэлэрин үөрэх салалтатын иһитиннэрэр-методическай салаатын исписэлиистэрэ Тамара Федорова, Клара Кириллина, Екатерина Огоюкина, Александра Никитина сыаналаатылар, түмүктэри сүрүннүүр исписэлиис Эмма Давыдова таһаарда.
«Знатоки» хамаандаттан Дария Христофорова алын сүһүөх кылаас оҕолоругар идэни талыы хайысхатыгар ситимнээх үлэни ыытарын сэргээтибит. Болугур, Амма 1 №-дээх оскуолалара бэйэлэрин выпускниктарын кытта тэйиччиттэн алтыстылар уонна кинилэр холобурдарыгар ситиһиилээх киһи туһунан санааларын үллэһиннилэр. Ситиһии төрүтүн анаарыыга оҕолор көхтөөх кыттыыларын Болугуртан Ганира Нестерова сатабыллаахтык ситистэ. Амма 2 №-дээх орто оскуолатын учуутала Сардаана Неустроева уруогар оҕо оҕоттон үөрэнэрин таба туһанна, үбү-харчыны сөпкө туттуу албастарын билиһиннэрдэ. Турнирга саамай кэрэхсэбиллээҕэ Чакыр, Соморсун уонна Амматааҕы лицей учууталларын хамаандалара эр дьон толору састаабынан кыттыылара буолла. Лицей учууталлара Григорий Чемезов уонна Евгений Ефремов 8 кылаас уолаттарыгар улууспутугар баар хара тыабыт кыылларын, өрүспүт, күөллэрбит балыктарын, көтөрдөрүн туһунан уонна булт-алт сиэрин-туомун тутуһууну, өбүгэ үгэһин кэпсээтилэр.
