Боксаҕа Россия чемпионатын түмүгүнэн хамаанда тэриллэн, Олимпийскай оонньууларга сүүмэрдиир күрэхтэһиилэргэ бэлэмнэнии саҕаланыа. Манна чемпионнар эрэ буолбакка, призердар эмиэ киирдилэр. Бу туһунан кылаабынай судьуйа Виктор Фархутдинов эттэ. Онон Василий Егоров, төһө да иккис миэстэ буоллар, Токиоҕа буолар Оонньууларга кыттар кыаҕа сүппэт.  


Виктор Фархутдинов бэлиэтээбитинэн, Самараҕа буолбут Россия боксаҕа чемпионата үрдүк таһымҥа ааста. Мэтээллээхтэр бары бириистээх миэстэҕэ тигистилэр. Эдэрдэргэ киирсэр уолаттар көрдөрүүлэрэ эмиэ үчүгэй.

«Онон 2024 сылга кыттыыга интэриэс баар, ол гынан баран билигин Лондоннааҕы турнирга уонна Олимпиадаҕа бэйэтигэр бэлэмнэнии соруктара тураллар. Биһиги бу боппуруоска оттомноохтук ылсыахпыт. Билигин Россия чемпионатын призердара бары уонна аан дойду чемпионнара Токиоҕа буолар оонньууларга бэлэмнэнии састаабыгар киирдилэр», — диэн Фархутдинов Россия боксаҕа Федерациятын пресс-сулууспатыгар эттэ.

Ахсынньы 10 — 15 күннэригэр хамаанда Ханты-Мансийскайга ньиэптээх дойдулар Кубоктарыгар кыттыыны ылыа. Ити эрээри аан дойду чемпионатыгар, аан дойдутааҕы байыаннай оонньууларга, Самараҕа кыттыбыт сорох спортсменнар турнирдартан босхолоноллор.

«Тохсунньуга Киргизияҕа сборданыахпыт, олунньуга — Кисловодскайга. Нальчикка олунньу 19 — 22 күннэригэр эмиэ сүүмэрдээһин ыытыллыаҕа. Ол кэннэ ким Лондоҥҥа барарын этиэхпит. Биһиги сөптөөх сүүмэрдээһини ыытыахпыт, онон күрэхтэһиигэ саамай күүстээхтэр барыахтара. Састаап бэлиэр быһаарыллыбыт диэччилэр — сыыһа толкуйдуугут», — диэтэ Фархутдинов.

0
0
comments powered by HyperComments