9 кылааһы бүтэрээччилэр икки булгуччулаах эксээмэн туттарыахтара. 11 кылаастар, үрдүк үөрэххэ былааннаммат буоллахтарына, БКЭ-тэн босхолоноллор. Ол оннугар судаарыстыбаннай эксээмэн баар буолуоҕа. Үөрэх миниистирэ Михаил Сивцев Инстаграмҥа БКЭ-2021 уратыларын кэпсээтэ, СИА суруйар.
Михаил Сивцев эппитинэн, РФ бырабыыталыстыбатын бэрэссэдээтэлэ Михаил Мишустин бу күннэргэ түмүктүүр аттестация ыытыытын уратыларын бигэргэттэ. Докумуоҥҥа олоҕуран, 9 кылааһы бүтэрээччилэр аттестаты ылалларыгар нуучча тылын уонна математиканы туттараллар. Талыыга эксээмэн диэн суох. Нуучча тылыгар ГИА ыам ыйын 24 уонна 25 күннэрэ, математика — ыам ыйын 27-28 күннэрэ. Саппаас күннэр бэс ыйыгар былааннаналлар.
11 кылаастар, үрдүк үөрэххэ киирбэттэр, икки предмеккэ ГВЭ туттараллар — нуучча тыла уонна математика. Ол түмүгүнэн аттестат ылаллар. Нуучча тылыгар ГВЭ ыам ыйын 25 күнүгэр, математика ыам ыйын 28 күнүгэр ыытыллар. Саппаас күннэр бэс ыйын 8 уонна 16 күннэрэ. Эбии күннэр: от ыйын 13 уонна 17, балаҕан ыйын 3 уонна 15 күннэрэ.
БКЭ-2021 сүрүн тэрээһинэ бэс ыйыгар буолар. Эксээмэни үрдүк үөрэххэ киирээччилэр уонна ааспыт сыллааҕы выпускниктар туттараллар. Ыам ыйын 31 күнүгэр саҕаланар уонна от ыйын 2 түмүктэнэр. Эбии туттарыы от ыйын 12 уонна 17 күннэрэ. Бу сигэнэн киирэн көрүҥ манна.
«Билигин эксээмэннэр буолар күннэрин иһитиннэрии ыытыллар уонна тэрээһин боппуруостар быһаарыллаллар — пууннары бэлэмнээһиҥҥэ. Бэлиэтээн эттэххэ, өрөспүүбүлүкэ быйыл эксээмэн матырыйаалларын сканердыыр технологияҕа көһөр. Ол эбэтэр баар үлэлэр барыта сканерданан баран интернетинэн тириэрдиллэллэр», — диэтэ миниистир.
