Билсибит киһитэ уоруйах эбит

0
93

Дьокуускай куорат олохтооҕо кыыс уоруу сиэртибэтинэн буолла. Онтугар бэйэтэ буруйдаах — саҥа билсибит киһитин дьиэтигэр аҕалбытын ааһан, баанын каартатын итэҕэйэн биэрбит.  


Дьокуускай куорат полициятыгар кини 20 тыһ. солк. харчытын баанын каартатыттан устубуттарын туһунан сайабылыанньа киллэрбит.

Быһылаан сиригэр тиийбит оперативниктар быһаарбыттарынан, ити иннинэ түүҥҥү кулуупка Кэбээйиттэн төрүттээх 23 саастаах уоллуун билсибит. Саҥа билсиилээҕин дьиэтигэр ыалдьыттата ыҥырбыт. Итиэннэ уолга «табахта атыылаһан кэл» диэн баанын каартатын биэрбит.

Онуоха бу эдэр киһи каартаҕа баар 20 тыһ. солк. устубут уонна бэйэтигэр ылбыт. Оттон кыыска табах атыылаһан баран, туох да буолбатаҕын курдук, кини дьиэтигэр кэлбит.

Кыыс утуйа сытарын көрөн, уорбут суолун-ииһин суох оҥороору, кыыс төлөпүөнүгэр кэлбит харчы уһуллубутун туһунан смс-иһитиннэриилэри барытын сотторбут.

Онто хантан абырыай — уорбута син биир биллэн, тутуллубут. Уорбут харчытын бэйэтин тус наадатыгар (аска, арыгыга, күүлэйдииргэ) туттубут.

Бу чахчынан РФ Холуобунай кодесатын 158-с ыст. 2-с чааһынан холуобунай дьыала тэриллибит.

Бу туһунан СӨ ИДьМ-тын пресс-сулууспата иһитиннэрдэ.

Маныаха маарынныыр быһылаан туһунан биһиги сайтпытыгар «Билбэт киһигин кытта барсыма» диэн төбөлөөх иһитиннэриигэ бу дьыл тохсунньу 11 күнүгэр суруйбуппут.

Санатар буоллахха, эмиэ киин куорат олохтооҕо дьахтар маҕаһыыҥҥа биир киһилиин билсэн баран, ол киһи дьиэтигэр ыалдьыттата ыҥырбытыгар, тута сөбүлэһэн барсыбыт.

Аһаан-сиэн баран, дьахтар кумааһынньыга, онно баар 5 тыһ. солк. харчыта сүппүтүн өйдөөн көрбүт. Киһититтэн төннөрөрүгэр модьуйбут. Онуоха киһитэ кыккыраччы мэлдьэһэн баран, дьахтары дьиэтиттэн холдьоҕон таһаарбыт.

Дьахтар тута полицияҕа эрийбит. Уорбаланааччыны туппуттар — Өлүөхүмэттэн төрүттээх, урут хаста да сууттана сылдьыбыт 27 саастаах киһи эбит.

Күндү кыргыттар, дьахталлар! Кытаатан, саҥа билсибит киһигитин итэҕэйэ охсумаҥ дуу — туох киһи буолара, бу көрсүһүү тугунан диэлийэн тахсара биллибэт буоллаҕа!

0
0