Тыа хаһаайыстыбатын бүтүн Россиятааҕы биэрэпиһин бастакы түһүмэҕин ыытыыга анаммыт төгүрүк остуолга Росстат, тыа хаһаайыстыбатын, экономика, үлэ, социальнай сайдыы министиэристибэлэрин бэрэстэбиитэллэрэ кытыннылар.
«Биэрэпис бастакы түһүмэҕэ атырдьах ыйын 15 күнүгэр түмүктэнэр. Тэрээһин биир методологиянан оҥоһуллар. Онон, бу түмүгэр тыа сиригэр хайдах быһыы-майгы үөскээбитин дьэҥкэтик билиэхпит. Манна олоҕуран тыа хаһаайыстыбатыгар анаммыт төһө сир быраҕыллан турарын, төһөтө туттулларын, дьиэ кыылын, үүнээйи ханнык көрүҥнэрэ баалларын, тыа хаһаайыстыбатынан ким дьарыктанарын, төһө бородууксуйа оҥоһуллан тахсарын, туох технологиялар туттуллалларын билиэхпит», — диэн судаарыстыбаннай статистика федеральнай сулууспатын Саха сиринээҕи уорганын салайааччыта Ирина Гаевая эттэ.
Тыа хаһаайыстыбатын миниистирин солбуйааччы Семен Потапов этэринэн, тыа хаһаайыстыбатын бородууксуйатынан бэйэни хааччынар буолууну өрөспүүбүлүкэ инники кирбиигэ тутар. «Биэрэпис түмүгэр хомуллубут дааннайдар судаарыстыба бэлиитикэтин үөскэтиигэ сүрүн миэстэни ылаллар. Саха сиригэр 3900 кэриҥэ бааһынай хаһаайыстыба баарыттан бүгүҥҥү туругунан 2300 отчуоттуур. Ону таһынан 100 тыһыынчаттан тахса кэтэх хаһаайыстыба баар. Биэрэпис түмүгүнэн хайа хайысханан үбүлээһини улаатыннарары, субсидия, субвенция ылааччылар ахсааннарын чуолкайдыахпыт», — диэтэ кини.
«Саха сирин 21 оройуонугар табаны иитэллэр. Сэбиэскэй кэм саҕана 80-с сылларга 380 тыһ. төбөлөөх эбит буоллахпытына, 90-с сылларга ити 134 тыһ. диэри аччаабыта. 2000- с сыллар саҥаларыгар күүстээх үлэ ыытыллыбытын түмүгэр төбө ахсаана эбиллибитэ эрээри, билигин эмиэ аҕыйыы турар. 2016 сыл тохсунньу 1 күнүнээҕи туругунан таба ахсаана 156 тыһ. төбө буолла. Ити былырыыҥҥыны кытта тэҥнээтэххэ, 5,6% аҕыйах. Табаны иитиигэ төбө ахсаанын элбэтии эрэ буолбакка, табаары оҥорон таһаарыыга көһөр соруктаахпыт. Онуоха таба төһөтүн ааҕар булгуччу наадалаах. Биэрэпис маныаха чопчу хоруйу биэриэҕэ», —диэн Арктика дьыалаларыгар кэмитиэт бэрэссэдээтэлэ Алексей Киселев эттэ.
