Санатар буоллахха, биэнсийэҕэ тахсар сааһы уһатар туһунан сокуон барылын Госдуума от ыйын 19 күнүгэр бастакы ааҕыытыгар ылыммыта. Ол аата бу сокуон син биир ылыллар, реформа олоххо киирэр диэн. Оттон балаҕан ыйыгар иккис ааҕыыта ыытыллыахтаах. Манна уларытыылары киллэриэхтээхтэр. Регионнар парламеннара бэйэлэрин этиилэрин ыыппыттара. Ил Түмэн састааба кэккэ этиилэрин киллэрэн туран, сокуон барылын ылынарга куоластаабыта.
Чэпчэтиилэр тустарынан эмиэ иккис ааҕыыга ылыныахтара. Регионнар бүддьүөттэриттэн үп ороскуоттанар буолан, чэпчэтиилэргэ Биэнсийэ пуондатын харчыта барбат.
Холобур, билигин биэнсийэлээхтэр тырааныспар, сир, дьиэ-уот, хаһаайыстыбаннай тутуу нолуогуттан босхолоноллор. Бу чэпчэтии оннунан хаалар.
Ону тэҥэ, үлэлээбэт биэнсийэлээхтэр икки сылга биирдэ айанныыр ороскуоттара төлөнөр. Үлэ бэтэрээннэрин кэккэ чэпчэтиилэрэ эмиэ оннунан хаалара күүтүллэр.
Ангелина Васильева, “Саха сирэ” хаһыат, edersaas.ru
