Күһүҥҥү үгэскэ кубулуйбут “Үүнүү-2019” быыстапка-дьаарбаҥка Бэрдьигэстээххэ Духуобунас киинин тиэргэнигэр ыытылынна. Бааһынай хаһаайыстыбалар, агро-оскуолалар, биирдиилээн оҕуруотчуттар көхтөөх кыттыыны ыллылар, бородууксуйаларын атыылаатылар.
Бу күн горнайдар сайыҥҥы түбүктээх үлэлэрин дьоҥҥо-сэргэҕэ көрдөрөн, атыылаан, кыра дохуот киллэриннилэр. «Олохтоох бэйэ оҥорон таһаарар бородууксуйаны, аһы-үөлүн дэлэтии, Горнай улууһун агро-хайысханан үлэлиир оскуолаларын үлэлэрин билиһиннэрии, бородууксуйаларын атыылааһын уонна хаартыскаҕа түһэриинэн дьарыктанааччылары өйүүр сыаллаах бу дьаһалы ыыттыбыт«, — диэн тэрийээччилэр кэпсээтилэр.
Орто Суртан оҕуруотун барытын бэйэтэ олордор, көрөр-истэр Никита Христофоров быыстапкаҕа аҕалбыт вьетнамскай кабачога улахана, хортуоппуйа бөдөҥө барыларын да сөхтөрдө! Никита Никитич кылгастык маннык кэпсиир:
– Сыл аайы редискэ, оҕурсу, помидор, луук, моркуоп, тыква, кабачок оттон да атыны олордобун. Быйыл хортуоппуйум сириттэн 70 куулу ыллым. Үчүгэйдик үүммүт. Бүгүн манна атыылаатым. Дьокуускайга олорор оҕолорбор эмиэ ыытабын. Хортуоппуйбун түөрт күн курдук, хас биирдии лууҥкаҕа хара буор, күл кутан олус бодьуустаһан олордобун. Быйыл хортуоппуйум биир лууҥкатыттан биир солуур курдук үүнүүнү ылан, олус үөрэ сылдьабын, эрэйим тилиннэ.
Кини “Чудо-овощ” номинация кыайыылааҕынан буолла. Электрическэй миксер тутта.
Ааптар: Күннэй Алексеева, сиһилии http://ulus.media ааҕыҥ
