Горнай улууһун Бэрдьигэстээҕэр Саха АССР норуотун хаһаайыстыбатын үтүөлээх үлэһитэ, оройуон бочуоттаах олохтооҕо, Кыһыл знамя уордьан кавалера, САССР Үрдүкү Сэбиэтин биэс ыҥырыытын дьокутаата, 1985-1989 с.с. социальнай хааччыйыы миниистирэ Дария Жиркова бюһун туруордулар.
Дария Жиркова пенсия кээмэйэ улаатарыгар, нэһилиэнньэ араас араҥатыгар босуобуйа көрүллүүтүгэр улахан өҥөлөөҕүн туһунан Үлэ уонна социальнай сайдыы миниистирэ Елена Волкова этэр. Ону таһынан, Дария Никифоровна Дьокуускайга, Өлүөхүмэ, Хаҥалас, Нерюнгри улуустарыгар социальнай эбийиэктэри тутуунан, социальнай үлэһиттэри дьиэнэн хааччыйыынан күүскэ дьарыктаммыт.
Үөрүүлээх тэрээһиҥҥэ Горнайдааҕы Үлэ уонна социальнай сайдыы управлениетын салайааччы Айталина Филиппова кыттыыны ылла.
