Бу күннэргэ А.Осипов аатынан Бэрдьигэстээх орто оскуолатын үөрэнээччилэрэ киинэ устарга холоннулар. Оҕолор сценарийдарын бэйэлэрэ суруйан, оруолларын, онно барсар таҥастарын-саптарын талан, чахчы сценарист-режиссер буолан ыллылар. Кинилэргэ биллэн турар, кылаас салайааччылара төһүү күүс, сүбэ-ама буолаллар.


Бэрдьигэстээх орто оскуолатын салалтата, кылаас салайааччылар «Тыйаатыр сылыгар” оҕолору киинэ эйгэтигэр сыһыараллар. Эдэр талаан арылларыгар элбэххэ үөрэтэллэрэ олус кэрэхсэбиллээх. Баҕар сотору кэминэн бу оҕолортон улууспутун, өрөспүүбүлүкэбитин ааттатар артыыстар, режиссердар буолан тахсыахтара турдаҕа.

Киинэни устуу куонкурус хайысхатынан ыытылынна. Дьүүллүүр сүбэ устуу хаачыстыбатын, тиэмэтин, туттуу-хаптыы култууратын, сюжетын, монтааһын барытын көрөн, бастыҥнары маннык быһаарда:

I миэстэ 10 “б “, кылаас салайааччыта В.А.Павлова, II — 10 “а” (кыл. сал. Е.К.Мартынова), III миэстэ 10 “в” (кыл. сал. С.П.Оленова).

Кыайыылаах буолбут кылаас киинэтин сүрүн ис хоһооно — ханнык да түгэҥҥэ бэйэҥ бэйэҕинэн хаал, олоҕуҥ режиссера, сценариһа эн бэйэҥ эрэ буолаҕын диэн олус дириҥ, толкуйдатар ис хоһоонноох буолан биэрдэ.

Кыайыылаахтар киинэлэрин сиһилии бу страницаҕа киирэн көрүөххүтүн сөп.

“Бастыҥ эр киһи оруола” – Вася Иванов (10 “а”), Павел Семенов (9 “б”) “Бастыҥ кэрэ аҥар оруола” – Виолетта Эверстова (10 “б”), Лена Строева (9 “а”), “Бастыҥ таҥыы” – 8 “б” кылаас, “Музыкальнай киэргэтии” – 8 “в”, “Бастыҥ сценарий” – 11 “б”, «Бастыҥ режиссер” – 8 “а”.

«Бу тэрээһин сүрүн сыалынан оҕолор айар, тэрийэр дьоҕурдарын, биир коллективка үлэлээһиннэрин сайыннарыы буолар. Балаһыанньа ирдэбилинэн киинэ устуутун, монтааһын оҕолор барытын бэйэлэрэ оҥордулар», — диэн тэрийээччилэр эттилэр.

Ааптар: Күннэй Алексеева, «Үлэ күүһэ» хаһыат, Горнай улууһа

4
1
comments powered by HyperComments